JEHONA E MUZIKËS SHQIPTARE

Spektaklin e madh, me këngëtarët: Bujar Qamili e Artiola Toska dhe me artistët humoristë: Behar Meraj e Rita Lati,  e ka organizuar Shoqata Shqiptare «Dardania» me seli në Lecco.

Shkruan: Engjëll KOLIQI

Autori i shkrimit me këngëtarin Bujar Qamili

            Fundjava që sapo e lamë pas, në qytetin pitoresk të Lekos (Lecco), rrëzë Alpeve, ishte një fundjavë me jehona të muzikës shqiptare, jehona këto që thënë me shprehje poetike, përnjëherësh dridhnin e ledhatonin Alpet e larta dhe të rrëpinjta e përnjëherë trazonin dhe përkundnin valët e Liqenit të Lekos, Komos e Luganos, pra deri në Zvicër.

Konferansierja me artistët: Behar Meraj e Rita Lati

            Salla e teatrit françeskan “Cenacolo”, me 512 ulëse, ishte e vogël për t’i pranuar të gjithë të interesuarit. Presidenti i Shoqatës “Dardania” Kastriot Pjetërnika dhe drejtori Paulin Kolndreu, kishin menduar me kohë dhe kishin bërë përgatitjet e duhura që gjithçka në këtë festë të madhe shqiptare të shkojë bukur, duke filluar që nga dekori i skenës, në ballë të së cilës ishin vënë dy flamuj shqiptarë dhe në mes mbishkrimi “Koncerti Dardania 2005”.

Këngëtarja Artiola Toska

            Shqiptarë të të gjitha moshave dhe të të gjitha trojeve tona etnike, u kënaqën në këtë spektakël madhështor të muzikës tonë të bukur, freskuar edhe me shkrepëtima humoristiko-satirike, që preknin të gjitha aspektet e jetës shqiptare. Artiola Toska dhe i Madhi Bujar Qamili, edhepse shkodranë, kanë kënduar këngë nga të gjitha trevat tona etnike. Edhe artistët e mëdhenj - Behar Meraj e Rita Lati, me shumë origjinalitet kanë prekur realitetin shqiptar në të gjitha aspektet e jetës, me shkrepëtimat e tyre humoristiko-satirike, si dhe me parodi speciale, të cilat i kanë kënduar si këngëtarë profesionistë.

Bujar Qamili, i cili negriti në këmbë të gjithë të pranishmit

            Përveç duartrokitjeve të gjata e frenetike, këtë koncert të bukur të artistëve të mëdhenj shqiptarë, e ka karakterizuar edhe një dukuri e rrallë. Shpesh ndodhte që mbi 80% të spektatorëve të ngriten në këmbë dhe të vallëzojnë, gjatë këndimit të këngëve ritmike, që shndërroheshin në valle të kënduara. Pastaj ndodhte që pothuaj se mbarë publiku të këndojnë me Bujarin e me Artiolën. Kanë qenë të shumta edhe dhuratat që publiku u dhuronte artistëve e sidomos fëmijët, që kënaqeshin në përqafim të artistëve dhe me puthjet e tyre. Kur ka mbaruar spektakli, artistët kanë janë fotografuar me qindëra mërgimtarë, duke plotësuar me dashuri e me respekt dëshirën e tyre që të kenë një fotografi me artistët e mëdhenj.

Artistët Behar Meraj e Rita Lati, që interpretuan mrekullueshëm humor e satirë

            Nuk duhet harruar kontributin e madh që kanë dhënë anëtarët e shoqatës, në angazhimin e gjithëmbarshë, që ka rezultuar me mbarëvajtjen e spektaklit, në të gjitha aspektet dhe në të gjithë minutat. Udhëheqësit e Shoqatës “Dardania” dhe të shoqatave të tjera shqiptare kanë premtuar publikisht se do të na organizojnë shpesh mbrëmje të tilla, me spektakle të bukura shqiptare.

Presidentii Shoqatës Kastriot Pjetërnika përshëndetë artistët dhe të pranishmit

Publiku që kënaqej duke vallëzuar…

Me ta edhe drejtori i Shoqates Paulin Kolndreu