NË LECCO U KREMTUA DITA E MËSUESIT DHE DITA E GRUAS:

SHOQATA  «DARDANIA» ORGANIZOI NJË KREMTE SHEMBULLORE

Në këtë kremte madhështore u inkorpurua edhe Epopea e UÇK-së, në përkujtim të luftës dhe të rënies heroike të Komandantit Legjendar Adem Jasharit, me familje, për lirinë e Kosovës.

Lecco, 8 mars 2005 (Bota Sot – Engjëll KOLIQI)

            E diela e 6 marsit këtu në Lecco ishte një ditë madhështore, që mbushi me tingujt e ëmbël të muzikës shqiptare këtë qytet pitoresk. Nga kjo kremte madhështore, ku ishin të pranishëm qindëra mërgimtarë shqiptarë, nga Tropoja, nga Shkodra, nga Karadaku i Kosovës, nga Kurbini, nga Ferizaj, nga Tirana, nga Durrësi, nga Vlora, nga Prishtina e nga vise të tjera shqiptare, si dhe shumë miq tanë italianë, tingujt e ëmbël të muzikës shqiptare shkonin valë-valë dhe përkëdhelnin – lartë majat e Alpeve e poshtë valët e Liqenit të Como-Lecco-s.

            Çdo gjë, deri te dekorimi i sallës ishte përgatitur shumë bukur nga kryesia e shoqatës «Dardania» të themeluar muaj më parë, nën drejtimin e presidentit Kastriot Pjetërnikaj dhe të drejtorit Paulin Kolndreu. Ishin të pranishëm shumë anëtarë të shoqatave shqiptare «Nëna Terze», «Stublla», «Iliria» dhe drejtues të QKIKH «Albeuropa». Recitimet e bukura të fëmijëve, këngët e zgjedhura nga muzika jonë popullore e burimore dhe vallet e bukura, me pjesëmarrjen e dhjetëra valltarëve i dhanë hijeshinë e merituar kësaj kremteje të trefishtë, ku veç Ditës së Mësuesit e Ditës së Gruas, u shënua edhe përvjetori i luftës dhe rënies heroike të Komandantit Legjendar Adem Jashari, me familje, për lirinë e Kosovës – pra u kremtuar edhe Epopea e UÇK-së. Ata që i dhanë hijeshinë kësa kremte të trefishtë, me këngë të bukura shqiptare – nga të gjitha trevat tona, ishin Ferdinand Deda e Agostin Cara.

            Një ditë më parë, në kuadër të kësaj kremteje, Shoqata «Dardania» kishte organizuar edhe gara sportive. Në turneun e futbollit, në finale janë takuar skuadrat Vëllaznia dhe Albeuropa, squadra këto tashmë të mirënjohje dhe më me shumë kupa të fituara në raste të tilla. Kësaj radhe fitorja i takoi skuadrës Vëllaznia.

            Drejtori i shoqatës – Paulin Kolndreu, në fund, duke i falënderuar të pranishmit, paralajmëroi edhe shumë veprimtari kulturore të kësaj shoqate për muajt e ardhshëm, ku po veçojmë një turne gjatë muajit maj, me një spektakël të madh muzikor-humoristik, me artistët: Bujar Qamili, Articola Toska, Rita Lati, Behar Meraj e të tjerë.

ENGJËLL  KOLIQI