NË KUVENDIN ZGJEDHOR (KONKLAVËN) 24 ORËSH NË SELINË E SHENJTË U ZGJODH PAPA I 265-TË

 JOSEPH RATZINGER – BENEDIKTI XVI

PASARDHËSI SHPRESËDHËNËS I WOJTYLËS

Konzervator i vendosur e shkencëtar i madh i doktrinës së krishterë. Papa që i tha JO homoseksualitetit, jo martesës së priftërinjëve, jo priftërinjëve femra, jo kungimit për të divorcuarit, jo komunizmit, jo kapitalizmit. Benedikti XVI me zgjedhjen ne emrit ka parajmëruar angazhimin maksimal për rregullimin dhe mirëqenien e Europës dhe të njerëzimit mbarë, si shërbëtor e punëtor i përvuajtur në vreshtën e Zotit dhe angazhimin e Tij maksimal për paqe në botë.

Tymi i Bardhë në oxhakun e Kapelës Sistina

Paralajmëroi zgjedhjen e Papës (19 prill 2005, ora 17:51)

 

Qytet i Vatikanit, 20 prill (Engjëll KOLIQI)

            Konklava (Kuvendi Zgjedhor), që kishte filluar të hënën në Kapelën Sistina në Vatikan, kësaj radhe është mbyllur vetëm pas 24 orësh, me daljen e tymit të bardhë në oxhakun e kapelës, që pikërisht në ora 17:51 të martën e 19 prillit, lajmëroi zgjedhjen e Papës së Ri.. Pak pas orës 18 jehoi fuqishëm edhe këmbana e madhe e Bazilikës së Shën Pjetrit e më pas edhe këmbanat e të gjitha kishave katolike anekënd botës, duke përhapur kështu gëzimin për zgjedhjen e papës. Me të shpejtë Sheshi i Shën Pjetrit u mbush me besimtarë e shtegtarë, nga shumë vende të botës, që për pak minuta kaluan shifrën qindmijëshe.

Joseph Ratzinger – Papa Benedikti XVI

            Në ora 18:41 në logjën e balkonit qendror të Bazilikës së Shën Pjetrit doli kardinali protogjakon Jorge Arturo Medina Estevez, i cili, në gjuhën latine, shpalli emrin e Papës së Ri. Habemus Papam (kemi Papën) JOSEPH RATZINGER – BENEDIKTI XVI.

            Në ora 18:28 në balkon u paraqit Ati i Shenjt Benedikti XVI, i sapozgjedhur, për t’i përshëndetur të pranishmit në shesh dhe të gjitha ata që e kanë ndjekur perms transmetimit të drejtëpërdrejtë televiziv perms mondovizionit dhe për t’u dhënë Bekimin Apostullik Urbi et Orbi. Benedikti XVI në paraqitjen e tij të pare ka mbajtur një fjalim të shkurtër më sa vijon: “Të dashur vëllezër e motra, pas Papës – të Madhit Gjon Pali II, zotërinjtë kardinaj më kanë zgjedhur mua, punëtor i thjeshtë dhe i përvuajtur në vreshtën e Zotit. Më ngushllon fakti që Zoti do të punojë dhe veprojë me instrumente të mangëta dhe mbi të gjitha besoj në lutjet tuaja, në gëzimin e Zotit të ringjallur, me plot besim në ndihmën e Tij të përhershme dhe  në Marinë, që është në anën tone”. Në fund të gjithë të pranishmëve dhe atyre që e kanë ndjekur perms radiotelevizionit, Ati i Shenjt u ka dhënë Bekimin e Parë Apostullik Urbi et Orbi. Gjatë këtij fjalimi të shkurtër Papa Ratzinger është ndërprerë pesë here me duartrokitje të të pranishmëve. Por ka pasur edhe të tillë, që sapo kanë dëgjuar emrin e tij, kanë lëshuar, të pakënaqur, Sheshin e Shën Pjetrit. Mbrëmë Papa nuk ka shkuar në pallatin papëror, por ka darkuar dhe ka fjetur bashkë me kardinajtë tjerë, në shtëpinë “Shën Marta”, ku ishin vendosur për konklavë. Inaugurimi solemn I Papës Benedikti XVI do të bëhet të dielën, më 24 prill 2005, në Bazilikën e Shën Pjetrit, ku ai do të udhëheq meshën e pare si papë, me fillim në ora 10.

Benedikti XVI përshëndet të pranishmit në Sheshin e Shën Pjetrit

Dhe u jep Bekimin Apostullik Urbi et Orbi

            Emrin Benedikti, Ratzinger nuk e ka zgjedhur rastësisht. Ati i Shenjt ka marrë emrin er Shën Benediktit (Bekimit) – patron i Europës. Ka marrë emrin e Papës Benedikti XV (1914 – 1922), i cili kishte reaguar ashpër kundër luftës së parë botërore dhe kundër dhunës përgjithësisht dhe ka stabilizuar marrëdhëniet e Selisë së Shenjtë me shumë vende, me të cilat më parë nuk kishte marrëdhënie të mira. Edhe për faktin se ka lindur në Ditën e Shën Benediktit (Bekimit). Është konzervator i mirënjohur, por jo edhe fundamentalist. Shkencëtar i mirëfilltë i doktrines së krishterë, filozof e teolog i përsosur. Para së gjithash është shumë i vendosur dhe këmbëngulës në idetë dhe parimet e tij. Ishte Ratzinger, që në duet me Gjon Palin II i tha vedosshëm JO – komunizmit e kapitalizmit, homoseksualizmit, martesës së priftërinjve, priftërinjve femra dhe kungimit e sakramenteve për të divorcuarit. Joseph Ratzinger në vitin 1985 komunizmin e ka quajtur turp të kohës sonë e e ka kritikuar ashpër edhe kapitalizmin. Nuk u shkon për shtati relativistëve dhe rrymave liberaliste brënda kishës Katolike Universale, me bindjen se e vërteta në shkencë dhe në fe është vetëm një dhe unike. Trasues i parë i rrugës së suksesshme dhe të shenjtërishme të Gjon Palit II, Benedikti XVI pritet ta vazhdojë me sukses rrugën e Wojtylës, në mbrojtjen e parimeve të doctrines së fesë dhe në shërbim të përhershëm të Zotit dhe të njerëzimit mbarë, për të mirën e përbashkët.

           Mbrëmë, drejtori i Sallës së Shtypit të Selisë së Shenjtë – Joaquin Navarro Valls, ka paralajmëruar udhëtimin e Benediktit XVI në atdheun e Tij, në gushtin e ardhshëm, kur në Këln mbahen takimet me rininë botërore, manifestim tradicional i nisur nga Gjon Pali II. Valls nuk e ka përjashtuar mundësinë që Papa i Ri të parën vizitë ta realizojë në Poloni, në token e Papë Wojtylës.

Paraqitja e parë e Atit Shenjt Benedikti XVI

            Joseph Ratzinger ka lindur më 16 prill 1927, në Martl am Inn, në Bavari të Gjermanisë. Rrjedh nga një familje agrarae dhe mjaft religjioze. I ati i tij më pas ishte edhe komisar i gjandarmërisë. Edhe një vëlla i tij është prift. Më 19 qershor të vitit 1951, pasi kish mbaruar studimet në filozofi dhe në teologji, është shuguruar meshtar (prift). Deri në vitin 1969 ka punuar profesor I dogmës së fesë dhe teologjisë, në shkollat e qyteteve të ndryshme në Gjermani (Friesing, Bonn, Münster, Tubing). Më 1969 emëroher professor ordinar I dogmatikës dhe histories së fesë, në Universitetin e Mynhenit. Më 24 mars 1977 Pali VI e emëron Kryeipeshkëv të Mynhenit dhe Frisingut, kurse më 29 qershor 1977 e shuguron kardinal. Më 25 nëntor 1981 Gjon Pali II e emëron Prefekt të Doktrinës së Fesë, në Selinë e Shenjtë, ku i ngarkohen edhe funksione të tjera: kryetar i komisionit biblik papëror, kryetar i komisionit të teologjisë ndërkombëtare etj. Më 10 nëntor 1999 Universiteti i Romës LUMSA i jep laurën honorem në jurisprudence, kurse më 13 nëntor 2000 zgjidhet akademik honorary I Akademisë Papërore të Shkencave. Më 30 nëntor 2002, Gjon Pali II e emëron Dekan i Kolegjit të Kardinajve, ku ishte deri dje, kur u zgjodh papë. Ratzinger ka botuar shumë libra shkencorë, ndër të cilët më të njohur janë: “Hyrje në Krishterim”, “Raporti Ratzinger” “Kripa e Tokës” “Milestones” (Gurtë Miliar, apo Gurtë e Shtyllës).

ENGJËLL  KOLIQI