EDHE PAS KEQËSIMIT TË RËNDË SHËNDETËSOR:

 

ATI I SHENJT GJON PALI II KA VETËDIJEN E PLOTË DHE ËSHTË SHUMË I QETË

 

Salla e Shtypit e Selisë së Shenjtë është e hapur ditenatë (24 orë mbi 24), ka deklaruar zëdhënësi i Selisë së Shenjtë në Vatikan – Joaqim Navarro Valls, i cili ka konfirmuar gjendjen e rëndë shëndetësore të Papës, por edhe stabilitetin e Tij psikik, duke pohuar se ka vetëdije të plotë dhe është plotësisht i qetë.

Qytet i Vatikanit, 1 prill 2005 (Engjëll KOLIQI)

            Gjendja shëndetësore e Atit të Shenjt Gjon Pali II, dje pasdite është keqësuar me shpejtësi. Në orët e pasditës, pas një infekcioni në rrugët urinare, trupin e Papës e kanë përshkuar ethe dhe temperature e lartë dhe i ka rënë dukshëm shtypja e gjakut – thuhet në buletinin mjekësor, të paraqitur mbrëmë nga zëdhënësi I Sallës së Shtypit të Selisë së Shenjtë – Joaqim Navarro Valls.

Megjithë përgatitjet në polikloinikën “Gjemelli”, ku Papa i është nështruar operacionit në fyt më 24 shkurt 2005, Ai nuk ka pranuar të rikthehet në spital, kështuqë i janë plotësuar të gjitha kushtet e mjekimit intensiv në apartamentin e Tij, në Pallatin Papëror, në Vatikan. Aty, përveç mjekut të tij personal – Prof Dr Renato Buzzonetti, është edhe Prof Dr Rodolfo Proietti (përgjegjësi i departamentit në spitalin “Gjemelli”, ku është operuar, pastaj dy specialistë të rianimacionit, një kardiolog, një otorinolaringoiatër dhe dy infermiere – pra një skuadër e fortë profesionale.

Gjatë tërë natës e edhe sot, në mjediset e Vatikanit janë qindëra gazetarë të akredituar në Romë, pothuajse të të gjitha massmediave botërore, të cilët me një interesim të jashtëzakonshëm po përcjellin gjendjen shëndetësore të Papës. Qendra radiotelevizive anembanë botës, përfshirë edhe ato arabe “Al Arabia” dhe “Al Jazira” kanë ndërprerë programet e tyre të rregullta, për të transmetuar emisione speciale informative, me kronikat mbi gjendjen e rëndë shëndetësore të Papës, nga korrespondentët e tyre nga Selia e Shenjtë. Edhe gjatë natës,, edhe gjatë ditës së sotme, në Sheshin e Shën Pjetrit në Vatikan, janë mijëra njerëz – katolikë dhe të religjioneve të tjera, për t’u lutur për Papën, që ka ndihmuar në ndryshimin e botës, për Papën, i cili është angazhuar gjithnjë për të mirën e përbashkët të njerëzimit mbarë – pa dallime fetare, racore, kombëtare as rajonale.

Në konferencën e shtypit, të mbajtur në ora 12:30, zëdhënësi Joaqim Navarro Vals, shumë i prekur, ka rikonfermuar gjendjen e rëndë shëndetësore të Papës, duke thënë se një pamje të Tij sisot, nuk e ka vërejtur në 26 vitet, që  është pranë Tij. Valls ka thënë se Papa ka presion jostabil arterioz dhe parametra biuologjikë të ndryshueshëm. Megjithë gjendjen e rëndë shëndetësore (fiziko-biologjike) Papa është me vetëdije të plotë – ka thënë Navarro Valls, duke shtuer se Ai nga strati ka përcjellur Meshën në ora 6 të mëngjesit dhe ka marrë kungimin, si dhe ka kërkuar leximin e Udhës së Kryqit dhe ka pranuar bashkëpunëtorët e Tij të ngushtë, ndër të cilët edhe Sekretarin e Shtetit të Vatikanit – Kardinalin Angelo Sodano. Ai është i qetë ehe po kërkon t’i lexojnë pjesë nga Shkrimi i Shenjtë. Valls u ka thënë gazetarëve se Saqlla e SAhtypit e Selisë së Shenjtë do të jetë e hapur ditenatë – 24 orë mbi 24, dhe se ata do të njoftohen vazhdimisht me risitë dhe gjendjen shëndetësore të Papës, i cili po mjekohet, me dëshirën e Tij, në apartamentin e vet, në Pallatin Papëror.

Në dy ditët e fundit, shtypi italian ka publikuar të dhënat nga Bullgaria, që flasin për atentatin ndaj Papës, më 13 maj 1981, të përmbushur nga shtetasi turk Ali Agça, si një atentat i organizuar nga KGB-ja ruso-sovjetike nga Moska e të realizuar nga shërbimet sekrete të Bullgarisë dhe të Gjermanisë Demokratike (comuniste të atëhershme), duke e cilësuar Papën Gjon Pali II, si një person shumë të rrezikshëm për bllokun sovjetiko-komunist. Ali Agça, nga një burg në Turqi, ku është prangosur, pas lirimit nga burgu i Ankonës në Itali, ka pohuar këto informazione dhe ka shtuar se ka pasur bashkëpunëtorë edhe nga komunistët italianë e edhe njerëz religjiozë, brënda në Vatikan, të cilët ia kanë mundësuar realizimin e atentatit. Hetimet po vazhdojnë.

ENGJËLL  KOLIQI