MESAZHI I OPTIMIZMIT TË PASHKËVE:

 RINGJALLA – NGADHNJIMI I JETËS MBI VDEKJEN DHE FITORJA E MIRËSISË NDAJ TË KEQES

Jezu Krishti ngjallet

dhe ngjitet në qiell, te Ati.

Ngadhnjen jet ambi vdekjen

Qytet i Vatikanit, 25 mars 2005 (Engjëll KOLIQI)

Këto ditë të Javës së Madhe, Kisha Katolike përkujton mundimet e Jezu Krishtit – siç thuhet në shkrimet e shenjta – për ta shpëtuar njerëzimin nga mëkati i rrjedhshëm, që doli nga Adami dhe Eva. Siç shkruajnë ungjilltarët (Luka, Mateu, Gjoni e Marku), sipas parashikimit të profetëve Krishti (zot e njeri) kishte pranuar mundimet deri me vdekje në kryq, për ta shpëtuar njerëzimin nga mëkati. Në të tretën ditë pas vdekjes, pra në Ditën e Pashkëve, Ai ishte ringjallur, duke simbolizuar kështu ngadhnjimin e jetës mbi vdekjen, ngadhnjimin e dritës mbi errësirën dhe fitoren e mirësisë ndaj të keqes.

Grave të devotshme, që në mëngjesin e së Dielës së Pashkëve kishin shkuar të luten pranë varrit të Tij, zëri i Zotit u kishte thënë: “Pse e kërkoni të gjallin ndër të vdekurit? Ai s’është këtu! U ngjall!” (Luka, 24, 5-6). “U ngjall ashtu siç pat thënë” (Mateu, 28,6).

Këto ditë përkujtimore të mundimeve, të vdekjes dhe të ringjalljes së Jezu Krishtit, në Selinë e Shenjtë, si zakonisht kanë filluar të dielën e kaluar, pra të Dielën e Larit, por kësaj radhe prania e Atit të Shenjtë është vetëm simbolike. Papa Gjon Pali II, 85 vjeç, i cili muajin e kaluar përjetoi një ndërhyrje kirurgjike në fyt, ndjehet ende i pafuqishëm të udhëheq me ceremonitë e këtyre ditëve të mëdha. Ai megjithatë nuk po dorëzohet dhe pas çdo ceremonie po paraqitet në dritaren e studios së vet, prej nga po i bekon qindëra e mijëra besimtarë në Sheshin e Shën Pjetrit, siç bënte edhe nga dritarja e dhomës së tij, në spitalin “Gemelli”, sa ishte i shtruar aty. Kështu Ai po na jep një shembull të mire, duke qenë gjithnjë në shërbim të Zotit dhe të njerëzimit. Sikurse riti i Darkës së Mbrame, mbrëmë, poashtu edhe riti i Udhës së Kryqit, sot në amfiteatrin antik të Romës “Colosseo” udhëhiqen nga kardinaj, të cilët regullisht po lexojnë mesazhet e Papës për besimtarët dhe për njerëzimin mbarë, në këto ditë të Javës së Madhe. Ati i Shenjtë kësaj radhe nuk do të mund të udhëheq as Meshët solemne të mesnatës e të mesditës së Pashkëve, por shpresojmë të mund të jetë i pranishëm në altar! Megjithatë Bekimi Apostullik “Urbi et Orbi” nga Shenjtëria e Tij, nuk do të na mungojnë – thonë burime nga Selia e Shenjtë.

Në ceremonitë e Meshës së Mesnatës, me rindezjen e qiriut mbi zjarr, do të shpallet ringjallja e Krishtit, si ngadhnjim i jetës mbi vdekjen. Me dritën e qiriut do të shpallet ngadhnjimi i dritës mbi errësirën dhe fitorja e mirësisë mbi të keqen. Porosia e gjithëhershme e Atit të Shenjt, me rastin e Pashkëve është: - Me kulturë të lartë jete dhe me dashuri ta mundim logjikën e vdekjes dhe urrejtjen dhe t’ia rikthejmë njerëzimit mbarë paqen dhe lumturinë!

Le ta ndërlidhim këtë simbolikë edhe me historinë, me fatin dhe me ardhmërinë e kombit tonë, që vit pas viti, shekull pas shekulli – brez pas brezi, ka përjetuar shtypje me dhunë e me urrejtje, shumë mëkate mbi kurriz e mbi supe, shumë padrejtësi..... Le të marshojmë pas dritës së shpresës drejt ringjalljes sonë kombëtare dhe drejt një jete të plotkuptimshme, të liruar nga mëkatet, nga vuajtjet, nga dhuna, nga shtypjet, nga urrejtja dhe le të jetojmë deri në amshim, megjithë kohën dhe historinë mbushur me drejtësi, me liri, me dashuri, me respekt, me solidaritet – që sot e deri në amshim. T’i lutemi Zotit të përbashkët, secili në mënyrën e vet dhe me ritet e fesë së tij, që edhe kombi ynë të përjetojë një ringjallje të vërtetë, por le t’i lutemi që ringjallja të vijë për njerëzimin mbarë dhe që në vend të shekujve të përgjakshëm, historisë le t’i vijnë shekuj me lule e me bukuri ngjyrash të ylberit!!!

ENGJËLL  KOLIQI