ARBITALIA 

Shtëpia e Arbëreshëve të Italisë

La Casa degli Albanesi d' Italia  

NË KREMTEN MË TË MADHE TË KRISHTERIMIT, NË PËRKUJTIM TË LINDJES SË KRISHTIT, ATI I SHENJT BENEDIKTI XVI KA KËRKUAR NJË BOTË PAQËSORE, TË LIRË DHE DEMOKRATIKE, ME NJË BASHKËJETESË TOLERANTE DHE ME AKTE MULTIKULTURORE:

Tashmë po shihet qartë – edhe Papa Ratzinger si Papa Wojtyla

Duke ndjekur hapat e bashkëpunimit ndërfetar, si parardhësi i tij – Gjon Pali II, Benedikti XVI është lutur në Xhaminë e Kaltërt në Stamboll, bashkë me Kryeimamin e Turqisë. Tash urimet e Krishtlindjeve, me rastin e Bekimit Apostullik "Urbi et Orbi" i ka shqiptuar në 62 gjuhë (siç bënte Wojtyla) e jo në 33, siç kishte vepruar ky një vit më parë. Kësaj radhe Ratzinger ka kërkuar me këmngulje paqe të qëndrueshme në Lindje të Mesme, në Afrikë dhe në mbarë kontinentin, duke bërë edhe një apel special, për një përspektivë të mirë dhe vetëvendosëse për popullin irakian. Nga ai janë dëgjuar shprehje të rrepta kundër konsumizmit të shfrenuar, duke u kërkuar gjeneratave të reja kthim kah Zoti dhe kyçje në akte bëmirësie e solidariteti. Ka kërkuar fuqishëm mbrojtjen e fëmijëve. "Edhe Benedikti, sikurse Gjon Pali, po tregohet një mik i madh i botës islame dhe nëse vazhdon kështu, besimet tona (myslimanë e katolikë) do të bëjnë mrekullira të mëdha në botë, si dy besime monoteiste të vëllazëruara, që kanë një Zot të përbashkët. Këtë mendim e kanë edhe hoxhallarët e Xhamisë së Romës"- thotë Reshadi, prijësi i një grupi besimtarësh myslimanë – mërgimtarë marokienë dhe tunizianë, të ardhur në Sheshin e Shën Pjetrit, për ta ndjekur Mesazhin e Papës.

Engjëll Koliqi

Romë (Qytet i Vatrikanit), 26 dhjetor 2006. – Krishtlindjet, sivjet, në Selinë e Shenjtë në Vatikan, janë kremtuar me dinjitet të lartë njerëzor – civilizues dhe fetar, me ceremoni joshëse, që kësaj radhe ishin të kombinuara me elemente nga antika, nga traditat fetare-kulturore në shekuj, si dhe nga bashkëkohësia, e gjithë kjo me dëshirën dhe kërkesën e vetë Papës.

Mbas keqkuptimeve nga qarqe të caktuara, me rastin e një citimi në Gjermani, mbi Muhamedin dhe islamizmin, si dhe mbas kritikave pasuese, që kinse atë që ka trasuar Gjon Pali II në kuadër të bashkëpunimit ndërfetar, ky "e ka shkatërruar", Ati Shenjt Benedikti XVI, në muajt e fundit po "ndërron" gradualisht, duke prekur gjithnjë e më haptas dhe më fuqishëm, çështje dhe problematika të ndjeshme të shoqërisë njerëzore, e madje edhe duke filluar serinë e hapave karizmatikë, sipas shembullit të paraardhësit të tij.

Sidomos, që nga vizita e tij në Turqi, Benedikti XVI po bëhet gjithnjë e më karizmatik dhe gjithnjë e më lartë dhe më ashpër po e ngreh zërin, kundër padrejtësive dhe dhunës në pjesë të ndryshme të botës, duke apeluar sidomos për mbrojtjen e më të pafuqishmëve, të fëmijëve.

Edhe gjatë ceremonive fetare të Kërshëndellave, në meshën e mesnatës, dje në meshën e paraditës dhe në urimet, me rastin e Bekimit Apostullik "Urbi et Orbi", poashtu edhe sot, me rastin e lutjes Engjëllit të Zotit, Papa Ratzinger, njësoj si Papa Wojtyla, ka kërkuar fuqishëm dhe sa më parë të rikthehet një paqe e qëndrueshme në mes popujve, në Lindjen e Mesme, me respekt reciprok dhe me tolerancë dhe bashkëpunim, në kultivimin e pasurisë multikulturore. Një apel special ka bërë për Irakun, duke kërkuar që t'i lejohet popullit irakian, që ta bëjnë dhe ta forcojnë paqen, me një bashkëjetesë tolerante. Gjithashtu ka kërkuar edhe rivendosjen e paqes në Afrikë – në Darfur dhe në zona të tjera të konflikteve. Ai u ka kërkuar besimtarëve katolikë, që ta dëshmojnë Jezu Krishtin, jo vetëm me fjalë, por me vetë jetën e tyre, duke u bërë shembull i mirë për njerëzit, në çdo kohë dhe në çdo vend ku ndodhen dhe veprojnë. Të krishterëve në Tokën e Shenjtë (Izrael e Palestinë) u ka kërkuar që me shembullin e mirë të tyre, t'ia mundësojnë sa më parë një vizitë frytdhënëse në mesin e tyre, pra në Lindjen e Mesme, ku dëshiron të jetë pjesëmarrës i drejtëpërdrejtë i përurimeve të solemniteteve paqësore, që do të shënonin fitore të lirisë dhe të paqes për të gjithë njerëzit atje, pa dallime racore as fetare.

Sidomos dje në mesditë, me rastin e Bekimit Apostullik "Urbi et Orbi", nga balkoni qendror i Bazilikës së Shën Pjetrit në Vatikan, ka qenë shumë i qartë në këtë drejtim dhe dukej se denjësisht e përpikërisht po e vazhdon rrugën misionare, në botën mbarë, sikurse paraardhësi i tij Wojtyla. Krishtlindjet, çdo vit na përkujtojnë – ka thënë Ratzinger – simbolizimin e thjeshtësisë dhe modestisë hyjnore të Zotit, që në botën tonë erdhi si fëmijë i varfër, duke u lindur në një grazhd të thjeshtë. Duke e ngritur zërin lartë kundër padrejtësive e dhunës ndaj popujve dhe ndaj njerëzve, kundër varfërisë dhe urisë së shkaktuar nga konfliktet e pakuptimta, si dhe kundër urrejtjes raciale e fetare, Papa ka apeluar sidomos te gjeneratat e reja, që të mos kremtojnë me ahengje e dëfrime shfrenuese, të zhytur në konsumizëm, por le të luten dhe ta falënderojnë Zotin, bashkë me nevojtarët, duke i ndihmuar dhe përkrahur ata, pa dallime racore, fetare as rajonale. Mesazhin, me urimet për Kërshëndellat, kësaj radhe Ratzinger e ka shqiptuar në 62 gjuhë botërore, përfshirë edhe gjuhën tonë, me buzëqeshjen dhe përshëndetjet e grupeve të ndryshme etniker të besimtarëve, që brohorisnin në shesh (ishin qindëra mijëra), me një karizëm të theksuar, siç ishim mësuar ta shohim te Papa Wojtyla, pra jo më në vetëm 33 gjuhë, siç bëri një vit më parë.

Në mesin e shtegtarëve, që në mesditën e Krishtlindjeve, në Sheshin e Shën Pjetrit ishin mb i 150 mijë, ishin edhe disa qindëra shqiptarë të tri besimeve. Kishte edhe besimtarë myslimanë nga vente të ndryshme. Takuam një grup myslimanësh nga Maroko dhe Tunizia, të cilët kishin ardhur ta shohin Papa Benediktin nga afër, siç thonin, mbase e ka treguar veten si mik i madh i botës islame, me rastin e vizitës së tijn në Turqi dhe ka dëshmuar se ishin keqkuptime tendencioze atë që thuheshin për te pas citimit të bërë në Gjermani. Reshadi, që i printe grupit të besimtarëve myslimanë në Shën Pjetër (mërgimtarë marokienë dhe tunuzianë), ndër të tjera tha: "Edhe Benedikti, sikurse Gjon Pali, po tregohet një mik i madh i botës islame dhe nëse vazhdon kështu, besimet tona (myslimanë e katolikë) do të bëjnë mrekullira të mëdha në botë, si dy besime monoteiste të vëllazëruara, që kanë një Zot të përbashkët. Këtë mendim e kanë edhe hoxhallarët e Xhamisë së Romës".