NJË DELEGACION I KOSOVËS KA FILLUAR ME SUKSES VIZITËN SHUMËDITËSHE NË BRAZIL

Misioni lobues

në Minas Gerais ka filluar në tempujt e Zotit, në kryeqytet

Kosova, në kontaktet e para në Brazil po përfaqësohet nga një delegacion i Komunës së Vitisë (Musa Misini – kryetar i Kuvendit të Komunës, Sarë Gjergji – këshilltar i KK atje, dhe Engjëll Koliqi – gazetar dhe veprimtar i kësaj komune i akredituar në Itali). Kontaktet e para janë zhvilluar bujshëm, në tempujt e kulteve fetare në Belo Horizonte, kryeqytet i Minas Gerais-it, shtet në të cilin delegacioni ynë po zhvillon veprimtari të dendur lobuese për një Kosovë të pavarur e sovrane, e fortë dhe e gatshme për një bashkëpunim të frytshëm konstruktiv me vendet e interesuara në mbarë botën, në të gjitha fushat e jetës.

Shkruajnë: Engjëll KOLIQI & Vera Lucia ALVES-NEVES

            Belo Horizonte  (MG), 4 mars 2007. – Në kryeqytetin e Minas Gerais-it (MG), që ende pa mbushur 110 vjet, megjithë periferinë ka kaluar shifrën 6 milionëshe të banorëve, të premtën e 2 marsit në mesditë, kanë filluar bujshëm kontaktet e para zyrtare Brazil-Kosovë, me ç’rast Kosova po përfaqësohet nga një delegacion i Komunës së Vitisë (Musa Misini – kryetar i Kuvendit të Komunës, Sarë Gjergji – këshilltar i KK atje dhe Engjëll Koliqi – gazetar dhe veprimtar i kësaj komune i akredituar në Itali). Delegacioni ynë, mbas tejkalimit të të gjitha pengesave burokratike, për marrjen e vizave, në Prishtinë dhe në Milano, të enjtën më 1 mars, në ora 18:30 është nisur nga aeroporti i Milanos Malpensa për në Paris, prej nga udhëtimi ka vazhduar për në Brazil. Veprimtarët tanë kanë mbërritur në Sao Paulo, të premten e 2 marsit, në ora 6:40, prej nga ka vazhduar rruga për në Minas Gerais dhe kanë mbërritur në ora 10:45 në aeroportin Confins të Belo Horizonte-s, ku bashkë me ekipin shoqërues i ka pritur sekretari i parë dhe shefi i protokollit të kryebashkiakut të Belo Hotizonte-s – Z. Nárcio José Veloso, i cili të tre anëtarëve të delegacionit ua ka dhuruar nga një pako informacionesh mbi qytetin e Belo Horizonte-s (harta, depliante turistike, si dhe informacione në CD dhe DVD), si dhe drejtoresha e shkollës së teatrit në Belo Horizonte – Znj. Esmeralda de Carvalho Castro.

            Falë agjendës shumë të dendur, që ka ndryshuar për shkak të vonesës burokratike dyditëshe, delegacioni ynë, nga aeroporti ka shkuar drejt në takimin e parë, në Qendrën Islamike të Minas Gerais-it, në xhaminë shumë të bukur të kryeqytetit, ku përzemërsisht i ka pritur kryeimami i kësaj xhamie – Sheiku Hassan me bashkëpunëtorët dhe me xhematin (besimtarët) që kishin ardhur për ta falur xhumanë (për lutjet e së premtes). Edhe delegacioni ynë u bashkua në lutjet e besimtarëve vendorë, respektivisht në faljen e xhumasë. Mbas mbarimit të lutjeve, kryeimami Hassan, edhe publikisht, para besimtarëve (xhematit) i ka shprehur mirëseardhjen delegacionit kosovar dhe ka shtuar se ai vetë, por edhe besimtarët, gjithmnjë kanë përcjellur zhvillimet në Kosovë dhe kanë uruar një zgjidhje konform vullnetit të popullit shumicë atje. Kryetari i delegacionit – Z. Musa Misini i ka njoftuar të pranishmit me zhvillimet historike në Kosovë, duke potencuar sidomos tolerancën fetare të popullit shumicë dhe vullnetin e pathyeshëm për mvetësimin e Kosovës, me sovranitet të plotë mbi të gjitha tokat.

Kryetari i Komunës së Vitisë, duke folur për zhvillimet në Kosovë ka thënë se forcat pushtuese barbare të Serbisë, vetëm gjatë luftës së fundit kanë vrarë mbi 20 mijë njerëz të pafajshëm atje. Në luftën e fundit në Kosovë kanë rënë mbi 2500 dëshmorë dhe mbi 30 mijë familje kanë mbetur pa kulm mbi kokë, me të veja dhe me fëmijë jetima. Në mesin e qindëra mijëra shtëpive, Serbia në Kosovë, gjatë viteve 1998-1999 ka shkatëerruar edhe qindëra xhamia. Mbas luftës, krahas sanimit të dëmeve në sistemimin e familjeve dhe riaktivizimin e organizmave ekonomike, janë ndërtuar dhe restauruar edhe shumë xhamia dhe kisha, për t’i ofruar popullit edhe zhvillimin e ceremonive fetare. Në fund janë shkëmbyer dhurata. Kryetari Misini i ka dhuruar Sheikut Hassan një flamur shqiptar, një stemë të KK të Vitisë dhe një hartë të Kosovës në bronx, kurse Sarë Gjergji i ka dhuruar një koipje të librit të tij poetik “Peisazh Toke”.

            Mbas drekës me ekipin shoqërues, delegacioni është vendosur në apartamentin, që për këtë rast e ka liruar dhe e ka përgatitur special, shefja e protokollit të kësaj vizite – profesoresha universitare Dr Vera Lucia Alves Neves, e cila tashmë nga vendësit dhe miqt e saj njihet edhe si kosovarja e Belo Horizonte-s. Në ora 19 delegacioni ynë ka mbërritur në Kishën Famullitare të Shën Jozefit (patron i Belo Horizonte-s), ku ka marrë pjesë në një meshë speciale kushtuar mirëqenies së përgjithshme të popullit të Kosovës. Mbas meshe, në lokalet e kishës mysafirët kosovarë janë pritur nga prifti At Tonino, i cili – mbasi ka dëgjuar me vëmendje paraqitjen e zhvillimeve historike dhe aktuale në Kosovë, nga Kryetari Misini, ka shprehur një miradi dhe kënaqësi të posaçme, për këto çaste të bukura, që ka mundur të jetë në mesin e dëshmitarëve të tmerreve të papara historike, përfaqësues të një populli krenar dhe të denjë në rrugën e mirëfilltë të lirisë dhe të demokracisë, të vëllezërve të Shenjtëreshës së Dashurisë – Nëna Tereze. At Toninos, Engjëll Koliqi i ka dhuruar një kopje të librit të tij poetik – fitues të konkursit ndërkombëtar “Autorët për Europën 2005”, në Empoli të Italisë – “Il mio secolo si chiama amore” (Shekulli im quhet dashuri).

            Të shtunën, më 3 mars, delegacioni ka vizituar fabrikën mirënjohur të pijeve alkoolike “Vale Verde”, ku prodhohet pija tipike braziliane, e mirënjohur në gjithë botën – cachaça (kashasa) dhe parkun e saj ekologjik, në Betim – qytet rreth 50 km në jug të Belo Horizonte-s. Udhëheqësit e kësaj fabrike i kanë kërkuar delegacionit tonë mundësinë edhe të një takimi profesional, për të shqyrtuar mundësitë e hapjes së një filiali të kësaj fabrike, me një park të bukur ekologjik në Kosovë. Mbasdite delegacioni ka bërë një sheti nëpër qytetin e bukur të Belo Horizonte-s, me ç’rast ka vizituar kishën shumë karakteristike të Shën Françeskut të Asizit, si dhe muzeun e arteve, para të cilit bëheshin fotografime të nuseve të sapomartuara. Në mbrëmjen e së shtunës, mikptitësit i kanë dërguar mysafirët e lartë nga Kosova në Sallonin e Bukurisë, për t’i nderuar me shërbime tipike vendore – larje dhe prerje e flokëve dhe e thonjëve, të duarve dhe të këmbëve, si dhe masazhe në kokë.

            Të dielën e 4 marsit, delegacioni ynë, megjithëse ditë pushimi, ka vizituar panairin (tregun karakteristik) në Belo Horizonte, ku çdo të dielë shiten mallërat e mbi 3000 artizanateve.

            Është shumë me rëndësi të theksohet fakti se delegacioni ynë kudo po pritet me ngrohtësi, i konbsideruar si delegacion i Republikësa së Kosovës, që po bën hapat e parë të marrëdhënieve të drejtëpërdrejta ndërshtetërore Brazil-Kosovë, që sipas analistëve do të shënojnë fillimin e një bashkëpunimi të mirë dhe afatgjatë e të dobishëm për të dy palët. Këtë e dëshmon edhe fakti se në aeroportin e Belo Horizonte-s, delegacioni ynë kaloi pa kontrrolle pasaportash as dokumentesh të tjera, me nderime të larta në sallën VIP, ku priten delegacionet shtetërore. Edhe shtypi vendor po përcjell me një interesim të madh vizitën e delegacionit kosovar në Minas Gerais të Brazilit.