VAZHDON VEPRIMTARIA E DELEGACIONIT TONË NË MINAS GERAIS TË BRAZILIT:

Përgatitet java e kulturës kosovare në Brazil

Delegacioni ynë, nën drejtimin e kryetarit të KK të Vitisë – Z. Musa Misini, të martën e 6 marsit  e ka kaluar kryesisht në lokalet dhe në mesin  e përgjegjësve të jetës kulturore-artistike të shtetit të Minas Gerais-it, në Belo Horizonte. Gatishmëri e Pallatit të Arteve, për ta organizuar, në vjeshtën e këtij viti, javën e kulturës kosovare në Minas Gerais. Takime të vlefshme edhe në qendrën e artizanateve dhe në muzeun e arteve dhe të punës. Koncert i Orkestrës Simfonike të Pallatit të Arteve, në Belo Horizonte, në nder të delegacionit nga Kosova, me pjesëmarrjen e mbi 1500 shikuesve.

Shkruajnë: Engjëll KOLIQI & Vera Lucia ALVES-NEVES

Belo Horizonte (MG – Brazil), 7 mars 2007. – Të martëne e 6 marsit, delegacioni nga Kosova (Musa Misini – kryetar i KK të Vitisë, Sarë Gjergji – këshilltar i KK të Vitisë dhe Engjëll Koliqi – gazetar dhe veprimtar i akredituar në Itali), kanë pasur vizita dhe takime shumë të rëndësishme me drejtuesit e jetës kulturo-artistike të shtetit Minas Gerais të Brazilit. Të prirë nga shefja e protokollit të vizitës – Dr Vera Lucia Alves Neves dhe njëra nga hartueset e këtij protokolli – drejtoresha e shkollës së lartë të teatrit, në Universitetin Federal të Minas Gerais-it (MG) – Dr Esmeralda de Carvalho Castro.

Ka qenë shumë interesant dhe i frytshëm takimi në Pallatin e Arteve (më i madhi në Amerikën Latine), ku janë pritur nga kryetarja e Fondacionit Qeveritar “Clóvis Salgado” që administron këtë qendër – Lucia Camargo, me përgjegjësit e sektorëve të ndryshëm (teatër, muzikë, vallëzim, pikturë e skulpturë, kinematografi etj). Së pari, Znj. Camargo ka shpjeguar veprimtaritë dhe funksionimin e këtij pallati gjigant, ku kishte sallën e madhe të teatrit, me 1707 ulëse, dy salla të tjera më të vogla për teatër dhe muzikë, sallat e vallëzimit, biblioteka, kinemanë, katër galeri për pikturë e skulpturë, qendrën e artizanateve, shkollën e lartë të teatrit, muzikës dhe vallëzimit dhe shumë veprimtari të tjera përcjellëse. Kryetari Misini i ka njoftuar mikptitësit me zhvillimet histrorike dhe me realitetin e tashëm në Kosovë, duke theksuar nevojën e madhe dhe të ngutshme që vendi ynë ka për mbështetje nga bashkësia ndërkombëtare dhe nga vende mike e popuj miq, anekënd botës. Ai nga Znj Camargo dhe bashkëpunëtorët e saj ka kërkuar mundësinë e bashkëpunimit të frytshëm kulturor e artistik. Ishte shumë interesant dhe me rëndësi reagimi i menjëhershëm i mikpritësve, të cilët kërkuan hartimin e një projekti konkret për organizimin e Javës së Kulturës Kosovare në Belo Horizonte dhe qytete të tjera të këtoij shteti brazilian. Saulo Cunha de Oliveira – drejtor i planifikimit dhe udhëheqjes së financave dhe Mônica Cerqueira – drejtoreshë e hapsirës kulturore, mbas konsultimeve me mysafirët, kanë marrë përsipër hartimin  e një projektprogrami për organizimin e Javës Kulturore Kosovare në Kosovë, që mund të zhvillohet gjatë shtatorit të këtij viti. Me këtë rast, në Minas Gerais të Brazilit mund të qëndrojnë grupe kulturo-artistike e ansamble kosovare, piktorë, skulptorë, një trupë teatrore dhe fëmijët artistë. Për vlerat kulturore dhe historike në Kosovë, kanë folur edhe Sarë Gjergji dhe Engjëll Koliqi, të cilët janë ndjekur me mjaft interesim dhe vëmendje nga mikptirësit.

Pastaj delegacioni ynë, në qendrën e artizanateve, që funkciononte gjithnjë në gjiun  e Pallatit të Arteve, është pritur nga kryetarja – Arutana Cobério Terana dhe nënkryetarja Maria Lúcia Simōes, që i kanë n joftuar mysafirët me veprimtarinë 35 vjeçare të kësaj qendre. Mbasi kanë hspjeguar zhvillimin e veprimtarive artizanale në Kosaovë, përfaqësuesit tanë dhe mikpritësit janë marrë vesh për shqyrtimin e të gjitha rrethsanave për një bashkëçpunim t ëndërsjelltë, në kuadër të bashkëpunimit të gjithëmbarshëm ndërshtetëror, rrugëve institucionale.

Mbasdite delegacioni ynë ka zhvilluar një vizitë në Muzeun e Arteve dhe të Punës, më i madhi në Amerikën Latine. Aty janë pritur nga Presidentja e Institutit Kulturor “Flávio Gutierrez” – Angela Gutierrez, e cila ka mbetur e mahnitur me të arriturat në Kosovë, gjatë viteve të pasluftës dhe ka premtuar një vizitë në Kosovë, për të shqyrtuar mundësitë e bashkëpunimit dhe të ngritjes së një muzeu historik atje.

Në mbrëmje, me fillim në ora 20, në sallën e madhe të këtij pallati gjigant të arteve, që kishte saktësisht 1707 ulëse, Orkestra Simfonike e Minas Gerais-it, me 74 instrumentistë, ka shfaqur një koncert special, në nder të delegacionit nga Kosova. Në koncert, ku kanë marrë pjesë shumë personalitete të jetës kulturo-artisike të këtij shteti brazilian, kanë qenë mbi 1500 spektatorë. Ishte kënaqësi e vërtetë të dëgjoje dhe shihje duatrokitjet frenetike, kur u kumtua se ky koncert ishte organizuar për nder të delegacionit nga Republika e Kosovës, që do jetë një shtet mik i Minas Gerais-it dhe përgjithësisht i Federatës Braziliane.

Dita e pestë e delegacionit tonë në Brazil është mbyllur me një darkë pune, shtruar nga funksionarja financiale e qeverisë vendore, që do të mbështesë të gjitha projektet e bashkëpunimit – Znj Amélia Agostini, e cila ka premtuar mbështetjen financiare të të gjitha projekteve të bashkëpunimit ndërshtetëror, sidomos në lëmin e veprimtarive kulturo-artistike.