News

MBI 1800 MËRGIMTARË SHQIPTARË NË LECCO DHE NË RRETHINË PO PËRGATITEN PËR TË KREMTUAR DENJËSISHT DITËN E FLAMURIT DHE TË PAVARËSISË SË SHQIPËRISË

do të organizohet edhe lotaria festive për motive humanitare në Kosovë

Lecco, 20 nëntor 2003

Mërgata Shqiptare në Lecco dhe rrethinë, tashmë, sipas burimeve zyrtare të pushtetit lokal këtu, numëron mbi 1800 shpirtëra - mbi 1100 janë nga Shqipëria, rreth 700 nga Kosova dhe disa dhjetëra nga IRJ e Maqedonisë. Si mërgatë e re, shqiptarët këtu, edhe në mungesë përvoje, në vitet e para ishin të paorganizuar. Me shpërthimin e luftës çlirimtare në Kosovë, me një nismë spontane, në fillim të vitit 1999 u themelua këtu Shoqata Kulturore Humanitare «Nëna Tereze" dhe bashkëkombasit tanë, por kontributit që dhanë për luftëtarët e lirisë dhe për popullin në Kosovë, filluan edhe me veprimtari të ngjewshura atdhetare, kulturore e humanitare.

Që në vitin 1999, kur në bashkëpunim me Kryqin e Kuq dhe me organizatat tjera humanitare (IPSIA, ACLI etj) kishin hapur një strehimore për 54 kosovarë të ikur nga lufta, në qershor kishin organizuar kremten e parë - Lirinë e Kosovës nga pushtuesit gjakatarë serbosllavë. Duke parë vlerat e mëdha shpirtërore dhe patriotike që mund të fitohen me veprimtari të organizuara kulturore, bashkëkombasit tanë këtu kishin vendosur që të bashkohen sa më shpesh në kremtime dhe që kremtet të jenë tradicionale. Dhe kështru u bë: çdo fund nëntori këtu zhvillohet kremte e madhe, me rastin e Ditës së Flamurit dhe të Pavarësisë së Shqipërisë e çdo qershor kremtohet Çlirimi i Kosovës nga kthetrat e gjakatarëve serbosllavë. Por organizohen edhge kremte të tjera dhe shumë veprimtari kulturore, artistike e sportive. Veprimtaritë sportive tashmë janë bërë të zakonshme - çdo të dielë dhe garojnë rregullisht së paku tetë skuadra shqiptare në futboll të vogël.

Këto ditë, gjithnjë nën organizimin e Shoqatës «Nëna Tereze» në Lecco po punohet me të madhe në përgatitjen e kremtimit të Ditës së Flamurit dhe të Pavarësisë së Shqipërisë. Kryetari i shoqatës - Pashk Ballabani e kishte shndërruar shtëpinë e tij në sallë ushtrimesh. Aty çdo mbrëmje tubohen të rinjt dhe ushtrojnë për kremten e madhe. Shpesh ushtrimet për programin kulturo-artistik i mbajnë edhe në shtëpinë e Luz Koliqit - nënkryetar i Shoqatës Integruese Kulturore e Humanitare «Stublla», e themeluar muaj më parë, që këtë vit i është bashkangjitur shoqatës «Nëna Tereze», në organizimin e kremtes së Ditës së Flamurit, duke kërkuar që të organizohet edhe një lotari festive e të hollat e grumbulluara t'i dërgohen familjes së Jak Munishit në Stubëll, i cili me fëmijët e tij është pa kulm mbi kokë.

Të gjitha këto përgatitje po bëhen në koordinim me Qendrën Koordinuese Integruese Kulturore e Humanitare «Albeuropa» - na tha Z. Pashk Ballabani, i cili shtoi se përmes kësaj qendre, kësaj radhe kemi nderin që në programin kluturo-artistik të kemi orkesdtrën popullore të SHKA «Zëri i Karadakut» nga Stublla e Karadakut, respektivisht orkestrën e mirënjohur të Vëllezërve Demaj. Udhëheqësi i orkestrës - Gëzim Demaj ka mbi një muaj që po punon me rininë, në përgatitjen e programit kulturo-artistik, me ndihmën e Lush Gjonit, Luz Koliqit, Nue Çokajt, Demush Xheladinit e të tjerëve.

Sipas një marrëveshjeje, kësaj radhe, përveç nga Italia do të marrin pjesë aktive edhe përfaqësues të shoqatave shqiptare nga Zvicra - si në programin artistik, poashtu edhe në turneun e futbollit të vogël. Gjithashtu paralajmërohet të shndërrohet në traditë ndarja e mirënjohjeve më të merituarve, ashtu siç filloi vitin e kaluar, me rastin e 90 Vjetorit të Pavarësisë së Shqipërisë, me ç'rast me mirënjohje speciale janë nderuar edhe: Gazeta jonë kombëtare "Bota Sot" dhe Presidenti i Kosovës - Dr Ibrahim Rugova.

ENGJËLL KOLIQI