News

NDËR GAZETAT SHQIPTARE NË ITALI:

MË E LEXUARA DHE MË E BESUARA

KOMBËTARJA «BOTA SOT»

Kërkohen hapja e një redaksie në Itali dhe shkrime të përditshme mbi veprimtaritë e mërgatës sonë këtu

______________________

Shkruan: Engjëll KOLIQI

Në këto kohë moderne, duke falënderuar shpejtësinë e qarkullimit të informacioneve dhe internetin, edhe Mërgata shqiptare, kudo që ndodhet, më lehtë dhe më shpejt po njihet me ndodhitë e aktualitetit në atdhe dhe kudo në botë. Në këtë drejtim, përveç katër kanaleve televizive shqiptare që transmetojnë programin përmes valëve satelitore dhe të shumë dritareve shqiptare të internetit, edhe redaksitë e gazetave tona kanë ndërmarrë masa, për plasimin e gazetave të përditshme dhe të atyre të përkohshme në shumë shtete europiane, ku jetojnë e veprojnë veprimtarët shqiptarë.

Në këtë konkurrencë, dikund të drejtë e dikund të padrejtë, stafi drejtues i të përditshmes sonë kombëtare «Bota Sot», që kishte hapur redaksinë, së pari në Zürich e pastaj edhe në Prishtinë, në Tiranë, në Tetovë e në New York, doli më i përgatitur se të tjerët, siç doli edhe gazeta jonë kombëtare më e pasura me realitetin kombëtar e ndërkombëtar, më e besuara, që nënkuptohet edhe më e lexuara. Është e vetmja gazetë shqiptare që përveç në Prishtinë shtypet, edhe në Europë dhe në Amerikë dhe shitet edhe në kontinentin përtej Atlantikut. «Bota Sot», duke ruajtur karakterin mbarëkombëtar e duke mos u mbështetur vetëm në një grupacion apo forcë politike, ia ka dalur qëllimit, që të depërtojë në çdo trevë shqiptare (pos në Shqipëri e një kohë edhe në IRJ të Maqedonisë, e ndaluar nga qeveritë e dy vendeve, vartëse dhe vegla të qendrave vendosëse në Beograd, Moskë, Athinë...). Ia doli gazeta jonë mbarëkombëtare, sepse aty e gjetë veten të gjithë: politikanët, shkencëtarët, punëtorët, intelektualët, shkrimtarët, studentët, nxënësit, bujqit - pleqtë e të rinjtë, hoxhallarë e priftërinjë, luftëtarë e paqësorë... Ia dol igazeta jonë, sepse në faqet e saj u përfshi, pa ngjyra politike, as ideologjike as fetare, as rajonale - aktualiteti dhe realiteti ynë kombëtar - megjithë origjinalitetin e tij, kudo që ndodhi e u zhvillua - në qytet e në fshat, në atdhe e në diasporë. Ia doli, se në faqet e saj gazeta jonë e përshkroi në mënyrën më origjinale realitetin tonë - edhe të këndshëm, por edhe të hidhur, ashtu siç e pa dhe ashtu siç e gjeti. Ia doli, gazeta jonë kombëtare, sepse në te gjetën vend dhe gjejnë gjithmonë hallet e njerëzve, nevojat, dëshirat... Ia dol idhe ia del kombëtarja "Bota Sot", sepse shkrimet e saja gjithmonë janë kushtrim për të mirën e kombit, për ardhmërinë e ndritur të farës arbërore!!!

Në Kosovë të gjitha të përditshmet tjera bashkë (herë katër e herë pesë sish) nuk e mbërriojnë tirazhin e së përditshmes kombëtare "Bota Sot", të cilën në orët e pasditës, vështirë e gjen më në kiosqe, ndërkohë që gazetat tjera mbesin përgjysmë të pashitura. E njëjta gjë ndodh edhe në vendet europiane. Mua personalisht, shpesh më ka ndodhur që në kiosqet në Gjermani, në Zvicër dhe në Itali, nuk e kam gjetur gazetën "Bota Sot", njëkohësisht kur gazetat tjera ("Koha Ditore", "Zëri i Ditës", "Fakti" e "Epoka e Re") kishin mbetur të pashitura. Gazetashitësit, në të gjitha rastet më janë përgjigjur: "Bota Sot këtu shitet brënda pak orësh"! Më ndodhi edhe të enjtën a kaluar në Trieste, kur një profesor i Universitetit të atjeshëm, më kërkoi një kopje të kombëtares sonë "Bota Sot". E kërkuam në tri pikat e shitjes në atë qytet dhe gjithëkund muarëm përgjigjen si ajo e mësipërmja, ndërkohë që gazetat tjera ishin me bollëk. Dje (të shtunën e 31 majit) pasdite u detyrova të sillem mbi dy orë nëpër Milano, për ta gjetur gazetën tonë kombëtare, që e donte Dr Dom Lush Gjergji, i cili kur i blemë (që në kioskun e parë) të tjerat, tha se nuk i duket se ka lexuar, po nuk e gjeti të përditshmen kombëtare "Bota Sot".

Idriz Beqiri - nga Elbasani dhe Vangjush Stefa - nga Berati, që të dy në Trieste, thanë se të parën punë që bëjnë në mëngjesin e çdo dite, përveç të dielës (që në Itali nuk na vjen dot) është shkuarja te kiosku për ta blerë gazetën tonë kombëtare "Bota Sot". Dhe jo vetëm për vete - thonë ata - por duhet t'i blejmë së paku nga dhjetë kopje, sepse na i kërkojnë bashkatdhetarët tanë që shkojnë shumë herët në punë e pasdite nuk e gjejnë më. Edhe Behxhet Bytyqi, Florimi, Malush Gashi, Mardena Kelmendi, Tefik Dërguti, Arsim Berisha, Avdi Beqiri, Isak Pera, Selman Sfishta e shumë bashkatdhetarë të tjerë në rrethet e Trevizos dhe të Viçencës, na thanë se po shkove pasdite nuk e gjen më gazetën "Bota Sot" në kiosk, sepse ajo shitet gjithmonë në orët e paraditës. Jemi mësuar ta gjejmë gjithmonë realitetin arbëror në këtë gazetë - thonë ata - prandaj nuk na e do t'i lexojmë gazetat tjera, që kryesisht botojnë lajme të përkthyera nga agjencitë e ndryshme të lajmeve ose edhe shkrime të gazetarëve të tyre, që shpesh duken si të jenë, jo vetëm të censuruar, por edhe të autocensuruar.

Mehmet Ramadani, Enver Jonuzi, Qashif Limani, Azem Dërguti, Ermira Hoxha, Josip Gjoni dhe shumë bashkatdhetarë të tjerë në Romë pohojnë të njëjtat gjëra dhe kërkojnë që kombëtarja "Bota Sot" ta hapë një redaksi edhe në Itali dhe të ketë çdo ditë shkrime mbi veprimtarinë e Mërgatës Shqiptare në Itali, ku tashmë jemi mbi treqindmijë (me arbëreshët mbi gjysmëmilioni). Të njëjtën gjë e kanë kërkuar edhe bashkatdhetarët - lexues të rregullt të gazetës sonë kombëtare në rrethin e Reggio Emilia-s - Agim Kodra, Rexhep Vatovci, Jakup Jakupi, Ismail Useini e të tjerë. Mendim të njëjtë kanë edhe Bekim Kastrati e Shkëlzen Muriqi - mjekë kosovarë, në specializim në klinikën e kardiokirurgjisë, në Torino, si edhe veterani shkodran atje - Hamza Kazazi. Hapjen e redaksisë në Itali e ka kërkuar edhe Pashk Ballabani - kryetar i Shoqatës "Nëna Tereze" në Lecco, në emrin e gjithë anëtarësisë së shoqatës, si dhe kryetarja e shoqatës "Skënderbeu", në Cernusco (Milano) - Dava Gjoka.