SHOQATA KULTURORE HUMANITARE «NËNA TEREZE» PO PËRGATIT NJË KREMTE MADHËSHTORE ME PLOT VEPRIMTARI KULTURORE-ARTISTIKE DHE SPORTIVE

 

Në garat sportive do të marrin pjesë edhe skuadra vendore të italianëve dhe të tjera të mërgimtarëve të kombeve të ndryshme që janë sistemuar në rrethin e Lecco-c.

 

Lecco, 22 nëntor 2002 (Bota Sot – ENGJËLL KOLIQI)

         Qindëra mërgimtarë shqiptarë të sistemuar në rrethin e Lecco-s në Lombardi, këto ditë po i bëjnë përgatitjet e fundit për të kremtuar në mënyrë madhështore Ditën e Flamurit, që sivjet ngërthen jubileun e madh – 90 Vjetorin e Pavarësisë së Shqipërisë. Disa ditë që po përcjell këto përgatitje po më duket vetja, si të ishem në Tiranë apo në Prishtinë. Në Lecco gjithçka frymon dhe jehon shqip. Edhe zyrtarët e autoriteteve vendore dhe prijës të organizatave joqeveritare që po ndihmojnë në organizimin e kremtes sonë kombëtare, këto ditë përshëndetnin vetëm shqip : mirëdita, mirëmbëma, tung, mirupafshim…

          Kryetari i Shoqatës Kulturore Humanitare «Nëna Tereze», me seli në Lecco – Z. Pashk Ballabani, me modestinë e tij të zakonshme tha se është rinia që po përgatit këtë kremte madhështore. Megjithë lodhjen nga punët e rënda ditore, të rinjtë e pakësojnë pushimin për 3-4 orë në mbrëmje, në mënyrë që të dalin faqebardhë të dielën e 1 dhjetorit, kur do të kremtojmë Ditën e Flamurit, me Jubileun e Madh – na tha Ai, plot entuziazëm dhe lavata për rininë përgjithësisht dhe për individë veç e veç, që po udhëheqin përgatitjet e pjesëve të programit. Në ora 9 do të fillojmë me turneun e futbollit, ku parashihet të garojnë nja 5-6 skuadra shqiptare dhe skuadrat e italianëve, të marokenëve, të senegalezëve, si dhe të mërgimtarëve nga Bregu i Fildishtë e nga Shrilanka, të cilët çdo vit na nderojnë duke u inkuadruar në veprimtaritë sportive e kulturore në kremtet tona – tha Z. Ballabani. Në ora 17, në palestrën e sporteve në Valmadrera, në periferi të Lecco-s do të fillojë kremtja, me fjalime e përshëndetje, për të vazhduar pastaj me koktej freskues dhe me program kulturo-artistik – me këngë, valle, recitime e humor. Programmi do të hapet me Hymnin Kombëtar, që kësaj radhe do ta këndojnë grupi i fëmijëve – kuptohet, të shoqëruar nga të gjithë të pranishmit.

          Adnan Balla dhe Luz Koliqi – pronar të firmave të vogla shqiptare na thanë se të gjithë ata që kanë pak biznes, do të kontribuojnë edhe me mjete finanziare në realizimin e suksesshëm të Kremtes Sonë Kombëtare.

          Sipas paralajmërimeve, në kremtimin në Lecco do të inkuadrohen edhe shoqata të tjera shqiptare nga mbarë Lomardia dhe nga krahina të tjera të Italisë veriore e lindore, si dhe janë ftuar pëfaqësues të shoqatave shqiptare nga Zvicra.

ENGJËLL KOLIQI

QIKSH «Albeuropa»

Via Principe di Napoli, 58/4

00062 BRACCIANO (ROMA)

I T A L I A

Tel & Fax ++390699809056

Tel. Cell.   ++393358099629

E-Mail:

albeuropa@iol.it

kosova@iol.it

kosova1@hotmail.com