News

KREMTIMI I DITËS SË FLAMURIT NË 90 VJETORIN E PAVARËSISË SË SHQIPËRISË, NË LECCO TË LOMBARDISË:

NË KREMTEN E MADHE - AFIRMIM I GJITHANSHËM I TRADITAVE TONA KOMBËTARE ME SOLIDARITETIN NË VEPËR DHE MIRËNJOHJE MË TË MERITUARVE PËR VEPRIMTARI ATDHETARE, KULTURORE E HUMANITARE

Shoqata Kulturore Humanitare «Nëna Tereze» e ka nderuar me mirënjohje speciale Kryetarin e Kosovës - Dr Ibrahim Rugova dhe gazetën kombëtare «Bota Sot»

Lecco, 02 dhjetor 2002 (QIKSH Albeuropa // Bota Sot // QIK // Trepça.net // Arbitalia)

____________________________

Shkruan: ENGJËLL KOLIQI

Qyteti i Lecco-s - pitoresk rrëzë Alpeve të larta, që këto ditë frymonte me vështirësi të mëdha nga problemet e mëdha të shkaktuara nga vërshimet dhe shembjet e dheut, të dielën e 1 dhjetorit, jo vetëm që frymonte lirshëm, por jehonte larg dhe dridhej megjithë rrethinë nga kremtja e madhe shqiptare, që me rastin e Ditës së Flamurit në 90 Vjetorin e Pavarësisë së Shqipërisë, e kishte organizuar Shoqata Kulturore Humanitare «Nëna Tereze». Kremte e madhe. Pjesëmarrësit nuk mund të numërohen në qindëra, sepse përfshirë edhe mysafirët, sigurisht që ka kaluar shifra mijëshe. Këndime e vallëzime, recitime, loteri festive me fitimin e dedikuar në solidaritet me një familje me pesë fëmijë jetima, në Kosovë. Shtrëngim duarsh, përqafime, puthje nga mysafirët e shumtë. Mirënjohje të shumta e falënderime.

Kremtja e madhe ka filluar në ora 9:00, me turneun e futbollit të vogël. Kampi sportiv "Due Ponti" në Malgrate (një paralagje e Lecco-s) ishte i vogël për t'i pranuar të gjithë të interesuarit që kishin ardhur ta ndiqnin turneun e organizuar me rastin e Festës Kombëtare Shqiptare - siç e quanin zakonisht vendorët dhe mërgimtarët e kombeve dhe të etnive të tjera, këtu. Siç kemi paralajmëruar ditë më parë, në turneun festiv kanë garuar edhe sportistë e skuadra të vendorëve dhe të mërgimtarëve të etnive të tjera. Gjithsejt kanë garuar dhjetë skuadra me rreth 100 sportistë, më sa vijon: Ballabani, 17 Nëntori, Besa, Woody, Pasturo, Albeuropa, Stublla3, Marocco, DJ Juro dhe Familja Moderne. Fituese e turneut është shpallur skuadra 17 NËNTORI, e përbërë kryesisht me mërgimtarët nga kryeqyteti ynë, të cilët skuadrën e kishin pagëzuar me Ditën e Çlirimit të Tiranës. Vendin e dytë e ka zënë skuadra BESA, kurse vendin e tretë skuadra DJ JURO. Skuadra e parë u shpërblye me kupë dhe me nga një dres për çdo lojtar, skuadrës së dytë i takoi pllaka speciale e turneut, kurse skuadra e tretë fitoi një top futbolli. Të gjitha ndeshjet, që janë ndjekur nga qindëra dashamirës të futbollit, kanë filluar me intonimin e hymnit kombëtar.

Kremtja e madhe me programin kulturo-artistik ka filluar në ora 17, në sallën e madhe të kishës në Pescate (paralagje e Lecco-s), ku edhe oborri ishte i vogël për t'i pranuar të gjithë pjesëmarrësit. Përveç qindëra bashkaktdhetarësh të ardhur edhe nga rrethe e vise të tjera të Italisë, nga Zvicra dhe nga Austria, në kremten e madhe kishin ardhur edhe mysafirë të shumtë: italianë, marokenë, senegalezë, si dhe mërgimtarë nga Shri Lanka e nga Bregu i Fildishtë. Programi ka filluar me hymnin kombëtar, të kënduar nga fëmijët, rinia dhe të gjithë të pranishmit. Mbasi u mbajt një minut heshtje në nderim të të gjithë dëshmorëve të kombit, gjatë gjithë historisë sonë kombëtare, kryetari i Shoqatës «Nëna Tereze» - Z. Pashk Ballabani i ka përshëndetur të pranishmit dhe ka folur për krijimin dhe realizimin e Aktit të ngritjes së Flamurit dhe të shpalljes së Pavarësisë më 28 Nëntor 1912, në Vlorën Krenare. Pastaj kanë përshëndetur mysafirët. Vlen të citohet famullitari i Pescate-s, Dom Alessandro Chiesa, i cili ndër të tjera ka thënë: "Jo vetëm që është kënaqësi e nder kur gjendesh në mes shqiptarëve, por ka kohë që, sikur më thotë shpirti - edhe unë jam shqiptar, jam kosovar". Pasuan përshëndetjet e mysafirëve - përfaqësues të autoriteteve vendore, të bashkësive mërgimtare të etnive të tjera, të shoqatave shqiptare mysafire dhe nga përfaqësues të organizatave joqeveritare që kanë ndihmuar dhe vazhdojnë ta ndihmojnë Kosovën e Shqipërinë dhe mërgimtarët tanë këtu. Edhe përshëndetjet e të huajve fillonin e mbaronin me fjalë shqipe. Këngë e vallëzime, recitime e humor - plot hare, deri në mesnatë. Në tryezën festive të pranishmit shërbeheshin me pije freskuese e me ushqime tipike shqiptare. Kënga e parë ishte kënga e Flamurit e pastaj, në përkujtim edhe të Ditëlindjes së Heroit Tonë - Adem Jashari, u këndua kënga "Mora fjalë" - kushtuar Komandantit Legjendar. Është organizuar edhe loteria festive - kësaj radhe me motive solidariteti. Janë shitur mbi 1000 bileta të loterisë (nga një euro secila). Kah fundi i manifestimit, nga fëmijët, janë tërhequr tridhjetë shpërblimet e loterisë dhe fituesit, pothuajse të gjithë shpërblimet i kanë lënë në fondin që shoqata ia ka dedikuar familjes së Marjan Qazimit, në Letnicë të Kosovës, i cili ka vdekur në moshën 39 vjeçare dhe ka lënë bashkëshorten me pesë fëmijë jetima dhe prindërit pleqë, pa kurrfarë të ardhurash financiare. Vetëm një biçikletë (shpërblimi i parë) e fituar nga Z. Adnan Balla (bashkatdhetar nga Durrësi) që e la për familjen e të ndjerit, është shitur tri herë, duke mbërritur çmimin prej 450 €, që janë hedhur në fondin e përmendur. Solidaritet i madh, sipas trraditave më të shëndosha shqiptare!! Kishte edhe italianë që shpërblimet e fituara në lopterinë festive i lanë në fondin për familjen Qazimi. Këtu lindi dhe u miratua ideja për organizimin e mbrëmjeve vëllazërore çdo muaj dhe për themelimin e një fondi të solidariotetit, dedikuar jetimave të dëshmorëve të UÇK-së.

Në fund, në mënyrë solemne u ndanë mirënjohje të posaçme, që kryesia e Shoqatës «Nëna Tereze», në mbledhjen solemne të mbajtur më 28 Nëntor, në 90 vjetorin e Pavarësisë së Shqipërisë, ua kishte ndarë veprimtarëve për kontributin e pashterrshëm në të mirë të kombit e atdheut. Me mirënjohje janë nderuar rinia jonë mërgimtare në Lecco e rrethinë, organizata humanitare italiane IPSIA që ka realizuar shumë projekte në Kosovë, Klubi Futbollistik «Roma» dhe lojtarët e saj Tomassi e Di Francesco, për poligonin sportiv të ndërtuar në oborrin e Shkollës Fillore «Dom Mikel Tarabulluzi» në Stubëll, si dhe veprimtarët: Pashk Ballabani, Luz Koliqi, Adnan Balla, Kristë Ballabani, Gjon Ballabani, Petrit Zefi, Engjëll Koliqi, Vitore Stefa-Leka, Ermira Hoxha, Dom Alessandro Chiesa e Paolo Brivio (si anëtarë nderi) dhe shumë veprimtarë të tjerë të shoqatës, si: Marjan Ballabani, Gjergj Lorenci, Kolë Demaj, Isak Gjoni, Demush Xheladini, Gjergj Krista, Leonard Krista, Gazmend Zeqiri, Marjan Gjergji, Marjan Ramaj, Marjan Andreja, David Ballabani, Nue Lorenci, Augustin Zefi, Josip Ballabani, Zef Ballabani, Difa Zefi, Drita Demaj, Fatmir Simani, Marjan Deda etj.

Me mirënjohje të posaçme u nderuan edhe: Kryetari i Kosovës - Dr Ibrahim Rugova, për kontributin e frytshëm dhe për merita të pashlyeshme në të mirë të Kosovës dhe popullit të saj, si dhe Gazeta Kombëtare «Bota Sot», për informim të shpejtë, të plotë e të drejtë dhe për kontribut e merita në nxitjen e proceseve në realiziminin e aspiratave tona kombëtare. U vendos që nga një delegacion i Shoqatës, mirënjohjet Kryetarit Rugova dhe botuesit të kombëtares «Bota Sot» - Z- Xhevdet Mazrrekut, t'ua dorëzojë personalisht në selitë e tyre (në Prishtinë dhe në Zürich).