News

NJË MËNGJES ME GJERGJIN

Duke dashur të hyjë brënda, pa e parë kush, pasiqë tërë natën ishte lodhur e stërlodhur - duke e vënë në rrezik edhe jetën - me kronikat dhe copëzat e historisë të mbledhura gjithandej, që i mbante në sqetulla, Gjergji mbërrijti mu në çastet kur nata e dërmuar po i hapte udhë ditës fatlume. Meqë kishte harruar se janë shumë të rralla netët që mua më vëjnë në gjumë, as kësaj radhe nuk hyri dot i pavërejtur.

Më gjeti duke e pirë kafenë - si zakonisht në këtë orë, prandaj ia mbusha edhe atij filxhanin dhe ia vura para. Derisa ishim duke i pirë kafet e ndezëm nga një cigare dhe tymi mbushi dhomën erëduhani. Filluam bashkë klasifikimet e kronikave dhe të copëzave të historisë: kjo për librin mbi Martirët, kjo për në muze, kjo për emisionet historike-dokumentare në radio dhe në televizion, kjo tjetra për ekspozitën e muajit të ardhshëm, këto këtu për gazetën tonë, këto të tjerat mund t'ua dërgojmë redaksive të ndryshme, këto - për institutin albanologjik, kurse këto të tjerat e kanë vendin në institutin e historisë të Akademisë së Shkencave. Edhepse meritat ishin shumë më shumë të tij, Ai gjatë klasifikimit më shumë e donte fjalën time. Prandaj, s'u durova pa e pyetur: - Pse, pothuaj të gjithë thonë unë dhe unë, duke dashur të vendosin për gjithçka e të ekspozohen gjithandej e gjithëkëndej, kurse Ti gjithnjë më kërkon - si t'ia bëjmë e ç'do të bëjmë, si është më së miri... duke kërkuar kështu mendimin tim edhe atëherë kur meritat janë kryekëput Tuajat, siç po bën edhe tash ?! Gjergji vuri buzën në gaz dhe ma kthei: "Vëllaçko, me ekspozime dhe me numërime të meritave individuale s'bëhet kurrgjë, prandaj le t'i bëjmë njëherë punët për së mbari dhe kur të vëhen në vend të gjitha ato që janë të përgjithshme e të vlefshme për të gjithë, atëherë vetëvetiu dalin e ekspozohen edhe meritat individuale e personale të secilit".

Derisa vazhdonim me klasifikimin e kronikave dhe copëzave të historisë, që Gjergji i kishte mbledhur me plot sakrifica dhe me kulmin e profesionalitetit të tij, në radio filloi një emision me radiokronikat nga ngjarjet e djeshme dhe me komentime nga dëgjuesit. S'vonoi paksa dhe dëgjojmë: "...në tubimin përkujtimor, shumë madhështor, ku ishin të pranishëm pos politikanëve të rinj që ia ndërruan faqen historisë sonë kombëtare, edhe bashkëluftëtarë e familjarë të dëshmorëve, munguan liderët e përfaqësuesit e partive politike, që pengonin Luftën dhe që nuk e donin Lirinë e Kosovës..." Gjergji, që në ato çaste dukej se po e han cigaren - i mbushur plot nervozizëm, ndau nja pesë-gjashtë kronika me dëshmitë nga Beteja në të cilën kishin rënë dëshmorët, për të cilët ishte organizuar tubimi i djeshëm përkujtimor, në përvjetorin e rënies heroike të tyre. Dukej si i çmendur, kur filloi me britmat: "S'bëhet kështu - as liria, as demokracia, as pavarësia, as historia e Kosovës. Ja dëshmitë origjinale mbi atë betejë, në mesin e të cilave - edhe dy të shkruara nga dora e dy dëshmorëve të rënë për liri. Ja, ata siç dëshmojnë edhe vetë - kanë luftuar kundër hordhive pushtuese të Beogradit e për Lirinë e Kosovës, pa anime kah grupimet politike as ideologjike. Që të dy këta qenë veprimtarë të dalluar të grupimeve politike të cilat tash po akuzohen për pengim të Luftës Çlirimtare. Jo-jo, s'bëhet kështu historia!!! Askush s'mund ta privatizojë - as kosovën, as UÇK-në, as historinë... Le ë dalë ku të dalë - historia do të shkruhet e do të vuloset origjinale, ajo që ishte dhe kurrë sipas shijeve e tekeve të individëve, as të grupimeve politike-ideologjike. Ja, këtu kam kronika që dëshmojnë për individë që kanë shkuar në radhët e njësiteve të UÇK-së vetëm për përçarje e ngatërresa e tash na dalin si kreatorë e padronë të Luftës Çlirimtare, madje-madje edhe sot vazhdojnë me shpifje, me përçarje e me ngatërresa - deri në fallsifikimin e historisë. Nuk durohen këto dhe nëse vazhdohet ky avaz i shpifjeve, i sharjeve e i përçarjeve, do të flasin edhe dëshmorët nga varri! Prandaj të thashë - nuk na nevojitet tash numërimi i gradave as i meritave. Le të bëhet njëherë historia - ajo origjinale, pastaj të gjitha gjërat vin në vendin e tyre!!!"

- Mos i trazo nervat - i thashë - se pas publikimit të këtyre xhevahireve që po i mbledh Ti, do të ndryshojnë shumë gjëra. Edhe tubimet përkujtimore, edhe shkrimet në gazeta, edhe emisionet radiotelevizive - të gjitha do të jenë të tjera. Të gjitha do të jenë në shërbim të së vërtetës, në shërbim të Realitetit Arbëror, që uroj të jetë i ndritshëm!

"Të lutem shumë - më ndërpreu - duhet t'i lëmë shprehjet Unë e Ti e të vazhdojmë me NE, sepse vetëm bashkë i bëjmë gjërat e mira dhe i përmbushim aspiratat tona kombëtare - të drejta, të ligjshme dhe të natyrshme!"

Derisa po bisedonim me Gjergjin dhe po shkarkonim nervozizmin, në radio filloi një muzikë e lehtë dhe e këndshme, që bashkë me rrezet e arta të Diellit, që sapo kishte aguar, si dukej na ftonin për një gjumë pushimi dhe...

Engjëll KOLIQI