News

KRYETARI I KOSOVËS - DR IBRAHIM RUGOVA REALIZOI NJË VIZITË INTERESANTE DHE TË FRYTSHME NË ITALI:

AUTORITETET E PUSHTETIT TË RRETHIT NË TERNI E NDERUAN KRYETARIN RUGOVA ME ÇMIMIN "SHËN VALENTINI NJË VIT I DASHURISË" DHE E SHPALLËN QYTETAR NDERI I TERNIT

Dr Ibrahim Rugova u prit nga shumë personalitete të jetës politiko-shoqërorer italiane, që nga Terni e deri në Këshillin e Ministrave në Romë. Ai u takua edhe me kryeministrin Silvio Berlusconi

Romë, 14 shkurt 2003 (QIKSH Albeuropa - ENGJËLL KOLIQI)

Kryetari i Kosovës - Dr Ibrahim Rugova, me ftesë të administratës së pushtetit vendor të Rrethit të Terni-t dhe të ipeshkëvit të Ipeshkëvisë së Terni-t Imzot Vincenzo Paglia, këto ditë ka zhvilluar një vizitë shumë interesante dhe të frytshme, në Romë dhe në Terni (qendër rrethi në Krahinën e Umbria-s, rreth 100 km në veri të Romës).

Duke qenë se Shën Valentini është patron i Ternit, këshilli komunal i atjeshëm, çdo vit më 14 shkurt - në ditën e këtij shenjti, nderon me çmimin tashmë tradicional «Shën Valentini - një vit i dashurisë» personalitete botërore, që kanë kontribuuar me të madhe për paqen dhe dashurinë ndërnjerëzore dhe të popujve përgjithësisht. Me këtë çmim janë nderuar shumë personalitete, si: ish presidenti rus Michail Gorbaciov, shkrimtari i famshëm izraelian David Grossman, palestinezi Sari Nuseibeh e të tjerë. Këtë vit, për veprimtari shumë të frytshme për paqe dhe dashuri ndërnjerëzore dhe për mirëqenie të popujve, Këshilli ka vendosur që Çmimin "Shën Valentini - një vit dashuri 2003" t'i jepet kryetarit të Kosovës Dr Ibrahim Rugova dhe drejtorit të shkollës së mbrojtjes françeskane, në tokën e shenjtë, në Betlehem - Ibrahim Faltas. Në arsyetimin e Këshillit, për laureatin e këtij çmimi - Dr Ibrahim Rugova ndër të tjera thuhet: "Dr Ibrahim Rugova, ka kontribuuar në shembjen e komunizmit, duke themeluar në Kosovë Lëvizjen e madhe demokratike dhe me mjete paqësore e demokratike veç ia ka dalur qëllimit të tij politik për pavarësinë e Kosovës, që në fakt tashmë është realizuar dita-ditës pritet njohja ndërkombëtare e njohjes së shtetësisë së Kosovës, ku Ai është president për më shumë se 10 vjet".

Kryetari Rugova është takuar me shumë personalitete të jetës politiko-shoqërore të Rrethit të Ternit dhe të Bashkisë. Ai bashkë me kryetarin e Bashkisë - Paolo Raffaelli, i cili e ka cilësuar Rugovën një njeri i madh i paqes botërore, dhe me ipeshkëvin e Ipeshkëvisë së Ternit - Imzot Vincenzo Paglia ka takuar rininë vendore - studentë e nxënës të shkollave të mesme të Ternit, në sallën e kinemasë "Fiamma" dhe u ka folur atyre për zhvillimet historike dhe dhe jetën aktuale në Kosovë. Të rinjt, shpesh e kanë ndërprerë kryetarin Rugova me duartrokitje frenetike - në shenjë admirimi të veprës së madhe të tij dhe në shenjë solidariteti me popullin e Kosovës. Për meritat e tij të mëdha politike, paqësore, humanitare e morale, si veprimtar i denjë i paqes dhe i solidaritetit njerëzor, Terni ka nderin që Dr Ibrahim Rugova të jetë qytetar nderi i këtij vendi, u tha ndër të tjera në arsyetimin e dhënies së qytetarisë së nderit, nga kryetari i Bashkisë e që u përcoll me duartrokitje frenetike nga të pranishmit. Ipeshkëvi Imzot Vincenzo Paglia - ish drejtues i Bashkësisë "Shën Egjidio" të Romës, ka theksuar se meritat më të mëdha për themelimin e shtetit të ri të Kosovës - të pavarur e demokratik - i ka kryetari Rugova, i cili ka ditur gjithmonë të vlerësojë demokracinë dhe gjendjen shpirtërore të njerëzve, duke e dashur popullin e tij dhe njerëzimin mbarë, pa mohuar vlerat e të tjerëve e duke mbjelòlur dashuri dhe solidaritet në mes njerëzve dhe popujve, në mes kulturave dhe religjioneve të ndryshme. Duke u përgjigjur në pyetjet e të pranishmëve, lidhur me luftën në Kosovë, Rugova ndër të tjera ka thënë: "Lufta është gjithmonë mjeti i fundit dhe më ekstrem për zgjidhjen e problemeve, por kur ajo zhvilohet në të mirë të paqes e jo të shkatërrimit, atëherë konsiderohet morale... Ne kosovarët duhet falënderuar Zotin për ndërhyrjen e NATO-s, që ka shërbyer për të shpëtuar një popull dhe një civilizim". "Edhe tash, mbarë bashkësia ndërkombëtare po punon vrullshëm për shmangien e luftës në Irak, por nëse nuk gjendet tjetër rrugëdalje për të penguar dhe asgjësuar armatimin që rrezikon njerëzimin, atëherë lufta do të jetë epashmangshme dhe e domosdoshme" - ka thënë kryetari Rugova, duke u përgjigjur në pyetjet rreth krizës së Irakut.

Në fund, në shenjë mirënjohjeje dhe falënderimi, kryetari Rugova i ka dhuruar klryebashkiakut të Ternit dy gurë të çmueshëm nga Toka shumë e pasur dhe e vlefshme e Kosovës.

Kryetari ynë është takuar edhe me personalitete të jetës politiko-shoqërore dhe të institucioneve shtetërore italiane. Ai është pritur edhe nga kryetari i Këshillit të Ministrave të Italisë - Z. Silvio Berlusconi. Në këtë takim, që ishte më i rëndësishmi i kësaj vizite, është biseduar për zhvillimet aktuale politiko-shoqërore dhe të sigurisë në Kosovë, duke i dhënë një hapsirë të madhe dhe një rëndësi të posaçme zhvillimit ekonomik të vendit tonë. Kryeministri Berlusconi, duke u interesuar për rrjedhat e zhvillimit ekonomik ka shprehur haptas interesimin e Qeverisë së Italisë në këtë drejtim, duke premtuar ndihma të vazhdueshme. Kryetari Rugova i ka kërkuar mikpritësit që të sensibilizohet kjo çështje dhe të binden investitorët italianë për të investuar sa më shumë në Kosovë, ku gjejnë edhe garancitë ndërkombëtare për mjetet e investuara dhepër prodhimin atje.

Dr Ibrahim Rugova, sot në mesditë - bashkë edhe me Imzot Mark Sopin - administrator apostullik i Kosovës, kanë marrë pjesë në Meshën solemne kushtuar Shën Valentinit, në bazilikën e këtij shenjti në Terni.

ENGJËLL KOLIQI