KREMTE MADHËSHTORE MULTIETNIKE PËR FLAMURIN TONË KOMBËTAR

Lecco, 27 nëntor 2001 (QIKSH Albeuropa – ILIRJANA & ENGJËLL KOLIQI)

            Të dielën e kaluar, Qyteti i Lecco-s në luginën e Liqenit të Como-s – mes Alpeve jehonte shqip. I tërë qyteti ishte në kremte – në shtëpi kulture dhe në qendra sportive. Kremtohej Dita e Flamurit Tonë Kombëtar. Që nga ora 8 e deri në mesnatë – plot 16 orë – kremtuan qindëra mërgimtarë shqiptarë, nga të gjitha trojet tona etnike, bashkë edhe me shumë miq të tjerë – italianë, kroatë, boshnjakë, marokienë dhe pjesëtarë të disa kombeve afrikane – mërgimtarë në këto vise. Prandaj, mer plot të drejtë, nga përfaqësues të pushtetit lokalë dhe të shoqatave humanitare e kulturore-sportive vendore, kremtja jonë u shpall KREMTE MADHËSHTORE MULTIETNIKE PËR FLAMURIN SHQIPTAR.

            Që nga mëngjesi e deri në mesnatë, udhëheqësit e sekcioneve kulturore-artistike dhe sportive të shoqatës dhe të gjithë pjesëmarrësit e manifestimeve, me dinjitet të lartë i kanë përmbushur të gjitha detyrat e marra nga kryetari i Shoqatës – Z. Pashk Ballabani, i cili tashmë është më se i dëshmuar për organizimin e kremteve shqiptare dhe për ngritjen dhe mishërimin e dinjitetit të traditave tona kombëtare, edhe ndër pjesëtarë të kombeve të tjera – mërgimtarë dhe ndër vendasit e këtushëm. Në ora 8.00 ka filluar turneu në futboll të vogël dhe është zhvilluar deri në ora 16.30, në dy fusha sportive të qytetit, që administrata e pushtetit lokal i kishte liruar gratis për kremten tonë. Nga dhjetë ekipet, katër nga të cilët ishin të etnive të tjera, më të mirët u shpallën, më sa vijon: Vendi i parë – DJ JURA, vendi i dytë – FLAMURTARI, vendi i tretë – ALBEUROPA. Lojtari më i mirë i turneut u shpall veterani Zef Ballabani, i cili edhepse mbi 40 vjeç, gjithnjë është në mesin e të rinjve – në lojërat sportive e në veprimtaritë kulturore. Dinjiteti i kulturës sonë që buron nga traditat e shenjta kombëtare u tregua edhe gjatë garave sportive, me brohoritjet dhe duartrokitjet e mërgimtarëve tanë, edhe për lojërat e mira të ekipeve të pjesëtarëve të etnive e të racave të tjera.

            Sapo mbaroi turneu i futbollit, sportistët dhe tifozët e tyre shkuan në sallën e shtëpisë së kulturës të famullisë së Pescate-s, ku famullitari – Dom Alessandro, dinjitetin dhe madhështinë e traditave tona kombëtare, si gjithëherë, edhe në këtë kremte e shpërblei me mikpritjen, si ajo e jona, me buzagaz dhe me fjalët e ngrohta përshëndetëse, duke e përsëritur për të satën herë: “Mirësevini! Urime e përgëzime! Këtu jeni si në shtëpinë tuaj!”

            Edhe programi kulturo-artistik, i udhëhequr me profesionizëm të plotë nga artisti vlonjat – Lusan Muhameti, ishte program multietnik, sepse përveç këngëve, valleve e recitimeve të bukura shqipe, u këndua edhe italisht e anglisht. Si zakonisht në kremtet tona kombëtare, dominuan këngët e recitimet me motive patriotike, kryesisht të kushtuara luftërave tona çlirimtare dhe dëshmorëve të kombit. Në vallet klasike dhe në vallet e kënduara vallëzonin me dhjetëra persona – burra e gra, pleq e të rinj, e edhe fëmijë – bashkë. Edhe mysafirët (italianë e të tjerë) here-herë futeshin në valle dhe vallëzonin njësoj sikur ne shqiptarët. Kremten madhështore të Shoqatës «Nëna Terze», me praninë e tyre e kanë madhëruar dhe nderuar edhe delegacione të mërgimtarëve tanë nga Rrethi i Bergamo-s.

            Jashtëzakonisht ishte i pëlqyer edhe kokteji freskues, ku me plot komplimente shijoheshin specialitetet tona (flia, pite të disa llojeve dhe ëmbëlsira tipike shqiptare). Vullnetarët e shoqatave humanitare të IPSIA-s dhe të ACLI-t të rretheve të Lecco-s dhe Varese-s, thanë se ndjejnë lumturi dhe krenari që kanë pasur rastin të shërbejnë në misionet humanitare në Kosovë dhe kanë lidhur miqësi me një popull dinjitoz dhe me tradita të shenjta, prandaj edhe sonte ndjehen shumë të lumtur që marrin pjesë në kremtimin e Ditës së Flamurit të popullit mik shaiptar! Edhe përfaqësuesit e pushtetit lokal – të departamenteve emigracionit, të arsimit, të kulturës dhe të sportit u shprehën shumë të kënaqur që patën nderin të jenë të pranishëm në këtë kremte kaq madhështore dhe thanë se ndjehen të lumtur që në rrethin e tyre kanë mërgimtarë shumë të vyeshëm, të cilët punojnë e jetojnë me nder dhe dijnë të bashkëpunojnë me rrethin dhe me bashkësitë e tjera të mërgimtarëve. Ata premtuan se së shpejti do të financojnë mësimin plotësues të gjuhës amtare për qindëra nxënës shqiptarë që ndjekin mësimet në shkollat vendore.