News

EDHE NJË NISMË E MIRË NË FABRIANO TË ANKONËS:

SHOQATA «UNITETI» PËR BASHKIM TË TË GJITHË SUBJEKTEVE ARBËRORE DHE KOORDINIM TË VEPRIMTARIVE

"Aty ku mblidhen shqiptarët për t'u marrë vesh për veprimtari të përbashkëta në të mirë të atdheut dhe të popullit tonë, nuk mund të mungoj" tha kryetari i Lidhjes Shqiptare në Botë - Z. Simon Kuzhnini, i cili kishte ardhur për ta përshëndetur nismën më të re të Shoqatës «UNITETI»

Romë, 7 maj 2002

QIKSH Albeuropa, Bota Sot, Arbitalia.net, Trepça.net

ANILA GRORI & ENGJËLL KOLIQI

Në Fabriano të Ankonës, atje ku shqiptarët flaasin e veprojnë legalisht, me vulën e Shoqatës Atdhetare «UNITETI», që - nga viti 1994 e deri më sot ka vulosur shumë nisma dhe shumë veprimtari konkrete në shërbim të çështjes kombëtare - këto ditë doli edhe një nismë e re, bashkë me kushtrimin për bashkimin e të gjithë subjekteve shqiptare në Itali e kudo që frymon fara arbërore.

Z. Hajredin Kaza - kryetar i Shoqatës Atdhetare «UNITETI» Znj. Lulëzime Kapxhiu - nënkryetare dhe Z. Xhafer Berisha - koordinator i kësaj shoqate, pas përgatitjeve disamujore, kishin caktuar të shtunën e 4 majit si ditë të mbajtjes së tryezës së rrumbullakët për bashkërenditjen dhe koordinimin e të gjitha veprimtarive të subjekteve arbërore në Itali, respektivisht për bashkimin e mirëfilltë të këtyre subjekteve, me moton BASHKIMI BËN FUQINË.

Në përkrahje të kësaj nisme, për të dhënë kontributin e tyre konkret, në Fabriano kishin ardhur kryetarë dhe përfaqësues të mbi dhjetë shoqatave shqiptare, nga Triesta, Treviso, Lecco, Roma, Perugia, Foligno, Ancona, nga Udine dhe nga vende të tjera të Italisë. Ftesës, me mirëkuptim i ishte përgjigjur edhe Z. Simon Kuzhnini - kryetar i Lidhjes Shqiptare në Botë, i shoqëruar nga anëtarët e Këshillit Kombëtar të LSHB-së - Znj. Vitore Stefa Leka dhe Z. Engjëll Koliqi.

Megjithë përgatitjet solide dhe profesionale të tryezës së rrumbullakët për bashkimin e subjekteve arbërore dhe bashkërenditjen e koordinuar të veprimtarive të tyre, mungoi finalizimi i paraparë, sepse nuk ishin të pranishëm kryetarët dhe përfaqësuesit e të gjitha shoqatave shqiptare (mbi 50 sish), edhepse shumica e kishin konfermuar pjesëmarrjen. Në këtë kontekst, sidomos janë kritikuar zotërinjt Hamza Kazazi e Adnan Kopliku - bashkëkryetarë të Bashkimit të Shoqatave Shqiptare dhe Italo-Shqiptare në Itali, që moti kohë nuk po funksionon dhe Z. Xhafer Berisha - kryetar aktual i Lidhjes Shqiptare në Botë për Italinë, sepse megjithë paralajmërimet për pjesëmarrje, që të tre munguan pa kurrëfarë arsyetimi e pa shpjegime.

Tryeza e rrumbullakët u hap me nderimin e të gjithë dëshmorëve të kombit, të rënë në elterin e atdheut në luftërat për lirinë e të gjithë shqiptarëve dhe me tingujt e muzikës shqiptare, me motive patriotike. Pas fjalës së hapjes të kryetarit - Hajredin Kaza, pasuan përshëndetjet reciproke, nga të cilat po veçojmë përshëndetjen e kryetarit të Lidhjes Shqiptare në Botë - Z. Simon Kuzhnini, i cili pasi falënderoi organizatorët e tryezës së rrumbullakët dhe nismën e Shoqatës «UNITETI», tha se nuk mund assesi të mungojë aty ku shqiptarët merren vesh për bashkërenditjen e veprimtarive të tyre në shërbim të atdheut dhe të kombit. Kryetari Kuzhnini ka garantuar përkrahjen pa rezerva të Lidhjes Shqiptare në Botë, për të gjitha veprimtaritë e frytshme kombëtare e atdhetare të të gjitha subjekteve arbërore - në atdhe e në mërgim.

Me interesim të madh është ndjekur Znj. Luljeta Berisha - juriste, e cila ka lexuar projektaktet normative të bashkimit të subjekteve shqiptare në Itali, të përgatitura profesionalisht. Në mes të diskutimeve, si freski, herë-herë organizatorët lëshonin muzikë kombëtare me motive patriotike dhe poetët pjesëmarrës - Vitore Stefa Leka, Engjëll Koliqi, Mardena Kelmendi, Nehat Marku e Xhafer Berisha - lexonin poezitë e tyre me motive patriotike dhe ato kushtuar dëshmorëve të kombit. Ishin emocionuese edhe rrëfimet nga ditët e para të mbarëvajtjes së mësimeve plotësuese në gjuhën shqipe në Shkollën Shqipe «ADEM JASHARI», e hapur ditë më parë në Fabriano, si fryt i veprimtariven të palodhshme të Shoqatës «UNITETI». Shumë stimuluese ishin ndërhyrjet e Znj. Vitore Stefa Leka, e shpallur Nënë Tereza e Triestës dhe Z. Luan Borshi - kryetar i Shoqatës «VËLLAZNIA» nga Roma, të cilët edhepse të moshuar nuk mungojnë aty ku mblidhen shqiptarët.

Këtë tryezë të rrumbullakët e kanë përshëndetur me telegrame e letra: Grupi i intelektualëve shqiptarë nga Roma, artisti nobelist nga Triesta - Z. Masrur Imani, anëtarët e Këshillit Kombëtar të Lidhjes Shqiptare në Botë - zotërinjt Kolec Traboini e Agim Bacelli, nga SHBA-të e të tjerë. Përmes telefonit, tryezën e rrumbullakët e kanë përshëndetur vëllezërit Naim e Sami Flamuri - nga Australia dhe gazetari e veprimtari ynë i shquar nga Nju Jorku - Z. Beqir Sina.

Si përfundim, në këtë tryezë është zgjedhur Këshilli Nismëtar për organizimin e një kuvendi mbarëshqiptar, për riorganizimin e Mërgatës Shqiptare në Itali, në një koordinim të të gjitha subjekteve arbërore, brënda 40 ditësh. Në këtë këshill nismëtar janë zgjedhur: Sokol Borshi, Ylli Jasa, Hajredin Kaza, Mardena Kelmendi, Jahir Zendeli, Nehat Marku e Abdulla Bufi.

Shoqata «UNITETI» ka shtruar një drekë për të gjithë pjesëmarrësit dhe mysafirët e tryezës së rrumbullakët. Në orët e mbrëmjes, shumë nga pjesëmarrësit dhe mysafirët e tryezës së rrumbullakët, bashkë me organizatorët e takimit ishin mysafirë në Klubin «BESA SHQIPTARE» në Fabriano, ku përveç një kokteji freskues, janë nderuar edhe me muzikë burimore shqiptare, nga rrapsodi i mirënjohur Gëzim Kodraliu.