News

NDËRROI JETË ARTISTI I MADH - MBRETI I KOMEDISË ITALIANE - ALBERTO SORDI

Alberto Sordi, mbreti i komedisë italiane, pas një sëmundjeje të rëndë që e mundoi për gjashtë muaj, ndërroi jetë pak pa i mbushur 83 vjet, në residencën tij në Romë, ku ishte nën kujdesin e së motrës - Amelia. Hapat e parë në kinematografi i kishte bërë që në moshën 15 vjeçare dhe ka mbërritur një rekord të mrekullueshëm, duke luajtur në hiq më pak se 190 filma. Përveç artist i madh dhe regjisor, Sordi ishte i dashur nga kolegët, nga miqt dhe nga mbarë popullata italiane e edhe në botë. Sofia Loren: "Sot është dita më e trishtueshme e jetës sime". Ai ishte edhe humanitar i madh dhe dashamirës i shqiptarëve e posaçërisht i Kosovës. Gjatë viteve '90 të shekullit që e lamë pas, Sordi në shtëpinë e tij kishte strehuar plot kosovarë të ikur nga terrori i pushtuesve serbianë dhe i kishte ndihmuar financiarisht ata dhe familjet e tyre në Kosovë.

Romë, 25 shkurt 2003 (QIKSH Albeuropa - ENGJËLL KOLIQI)

Sot në mëngjes, të gjitha massmediat italiane, me dhembje kumtuan lajmin mbi vdekjen e artyistit të madh, siç e quajtën - mbret i komedisë italiane - Alberto Sordi. I lindur më 15 qershor 1920, pas një sëmundjeje të rëndë, që e mundoi plot gjashtë muaj atë dhe të motrën Amelia që kujdesej për te, Sordi vdiq mbrëmë në orët e pasmesnatës, në residencën e tij në Romë. Artdashësit dhe mbarë opinioni italian e kanë përjetuar rëndë vdekjen e artistit të madh - të mbretit të komedisë.

Karrierën e tij artistike e kishte filluar në moshën 15 vjeçare dhe që në vitet '50 të shekullit të kaluar kishte shënuar suksese të mëdha në kupolën e artistëve të mëdhe nj italianë dhe botërorë. I madhi Alberto Sordi në karrierën e tij në kinematografi ka luajtur hiq më pak se në 190 filma, ndër të cilët shumë role kryesore. Që nga viti 1966 përveç aktrimit ka ushtruar edhe rolin e regjisorit, duke startuar me mjaft sukses me filmin "Tymi i Londrës". Nuk ka festival të filmit, ku Sordi nuk ka marrur çmime të larta. Çmimi më i dashur i tij ishte "Luani i Artë" i Festivalit të Venedikut.

Që në orët e hershme të mëngjesit, mijëra qytetarë të Romës ia kanë mësyrë residencës së tij, për t'ia dhënë nderimet e fundit artistit të madh - Alberto Sordi-t, atij që ka nderuar qytetin e Romës dhe mbarë Italinë, me interpretimet e mëdha filmike, me krijimtarinë e madhe të tij, por edhe me fisnikërinë dhe dashurinë e vërtetë për mikun dhe për njeriun përgjithësisht. Administrata e Bashkisë së Romës ka organizuar në lokalet e komunës ekspozeun e kufomës së Sordit dhe nderimet e qytetarëve dhe të përfaqësuesve të institucioneve shtetërore, politike, shoqërore, kulturore, humanitare.... Varrimi është shpalur për të enjtën, me ceremoninë fetare në Kishën e Shën Mërisë së Popullit, në ora 10, për të vazhduar gjithë ditën me nderime dhe përkujtime nga qytetarët dhe artistët, në sheshin e Popullit, në qendër të Romës.

Nga reagimet dhe dhembja e shumë personaliteteve shtetërore, politiko-shoqërore dhe të jetës kulturore-artistike, shihen vlerat e mëdha të artistit dhe të humanistit të madh - Alberto Sordi-t, i cili ndërroi jetë pak pa i mbushur 83 vjet. Presidenti i Republikës Carlo Azeglio Ciampi, duke i shprehur ngushllime familjes dhe mbarë popullit italian, ka thënë se me Sordin Italia krenohet gjithmonë dhe populli ynë ka dhembje të madhe për humbjen e artistit të madh - të ambasadorit tonë në botë. Njeri i vlerave të mëdha artistike e humanitare - e kanë vlerësuar shumë personalitete, me rastin e shprhjes së dhembjes së madhe, me rastin e vdekjes së artistit të madh - Sordi. Kanë shprehur dhembje shumë ministra, kryetarë e sekretar partishë politike, personalitete të shumë institucioneve shtetërore, shoqërore e kulturore-artistike, të institucioneve e organizatave humanitare... Kryebashkiaku i Romës - Walter Veltroni ka formuar këshillin për varrim, me nderime të larta shtetërore e kombëtare, për artistin e madh, për nderin e kinematografisë dhe komedisë italiane. Artistja e madhe - Sofia Loren, duke shprehur dhembjen e saj, me rastin e vdekjes së kolegut Sordi, mdër të tjera ka thënë se sot është dita më e trishtueshme e jetës së saj. Gilles Jacobs - president i Festivalit të Filmit në Kan (Cannes) të Francës, ndër të tjera ka thënë: "Alberto Sordi ishte një artist shumë i madh në mesin e të mëdhenjve, të një gjenerate të shkëlqyeshme".

Edhe massmediat po i kushtojnë hapsirë të madhe jetës dhe veprës së madhe artistike të Alberto Sordit, i cili ndërroi jetë sot Të gjitha emisionet e sotme informative po hapen me lajmin e kobshëm për vdekjen e artistit të madh dhe po ilustrohen me shumë inserte nga 190 rolet e tij në kinematografinë italiane dhe të shumë spektakleve teatrore e televizive.

Alberto Sordi ishte edhe humanitar i madh. Ai kishte një simpati të madhe për popullin shqiptar. Duke bashkëpunuar me shoqatat shqiptare në Romë, ishte njohur më për së afërti me realitetin kosovar dhe i ndjente në shpirt vuajtjet e popullit të Kosovës nën terrorin e pushtuesve serbianë. Gjatë viteve '90 të shekullit që e lamë pas, shtëpia e tij ishte shndërruar në një strehimore të kosovarëve. Dhjetëra të rinj kosovarë janë strehuar me javë e me muaj në shtëpinë e artistit të madh. Ai ishte edhe pjesëmarrës aktiv në manifestimet e protestat publike të shqiptarëve, në mbrojtje të popullit të Kosovës. Sordi ka ndihmuar edhe financiarisht shumë familje në Kosovë, për disa vjet me radhë.

ENGJËLL KOLIQI