News

EDHE NJË TRAGJEDI SHQIPTARE NË KANALIN E OTRANTOS:

GJASHTË TË VDEKUR E KATËR TË ZHDUKUR

Në mesin e të mbijetuarve të shpëtuar, edhe dy skafistët e barkës gomone të mbërritur nga Vlora. Të shpëtuarit - me lëndime të lehta e të rënda trupore, po mjekohen në spitalet e Lecce-s dhe të Galatina-s. Edhe me rastin e kësaj tragjedie nuk mund të mos shtrohen pyetjet: Deri kur do të luhet me jetë njerëzish?! Shtetin Shqiptar, e udhëheq Qeveria apo Mafia?! A ka me të vërtetë shtet në Shqipëri?!

Skuadrat shpëtimtare në akcionin e shpëtimit

Romë, 11 mars 2002 (QIKSH Albeuropa - E. KOLIQI & A. GRORI)

Edhe një tragjedi shqiptare ka ndodhur sot në Kanalin e Otrantos. Edhe kësaj radhe viktima janë të pashpresët, të cilët në kërkim të një jete më të mirë, jetën e tyre ua kanë besuar bandave të pamëshirë, bandave mafioze, të cilët të lidhur me qeveritarët e korruptuar të Tiranës, po luajnë me jetëra njerëzish.

Siç kanë njoftuar agjencitë e lajmeve, një barkë gomone, e nisur nga Vlora, në orët e mëngjesit, nga deti i trazuar - në forcën 7, ka pësuar havari dhe ka filluar të fundoset. Dikush nga ata në kërkim të shpresës, apo mbase edhe njëri nga skafistët, përmes telefonit çellular, ka lajmëruar pjesëtarët e policisë italiane në Vlorë se barka po fundoset e njerëzit po mbyten. ata kanë alarmuar skuadrat shpëtimtare, të cilët menjëherë kanë ndërmarrur operacionin urgjent të shpëtimit. Skuadrat shpëtimtare, rreth 20 milja në verilindje të Otrantos kanë shpëtuar 22 të mbijetuar nga tragjedia, i kanë transportuar me helikopterë dhe i kanë shtruar në spitale, në Lecce dhe në Galatina. Gjashtë të tjerë - të lidhur për barke, janë gjetur të vdekur. Mediat italiane, duke u bazuar në dëshmitë e të mbijetuarve nga tragjedia, flasin e dhe për katër të tjerë - të zhdukur. Në telekronikat televizive italiane thuhet se viktimat e tragjedisë së sotme të Otrantos janë kosovarë. Ndër të mbijetuarit e shtruar në spital ka edhe të lënduar rëndë, me rrezik jete - thuhet në raportet e agjencive të lajmeve. Të shtrirë në spital janë edhe dy skafistët e barkës që mori jetëra njerëzish.

Edhe me këtë rast, nuk mund të tejkalohet dhembja, pa pyetjet: Deri kur do të luhet e do të tregtohet me jetëra njerëzish të shkretë, të cilët në kërkim të shpresës për jetë, jetën e tyre ua besojnë bandave mafioze të pamëshirshme?! Athua shtetin Shqiptar e udhëheq Qeveria, apo Mafia?! A ka në të vërtetë shtet në Shqipëri?!